Ч.Хүрэлбаатар: Ам.долларын өсөлтөд Монголбанк шууд буруутай, бодлогын хүүг 10 хувиас дээш болгох шаардлагатай

Төгрөгийн эсрэг ам.долларын ханш чангарч байгаатай холбоотойгоор Монголбанк ямар арга хэмжээг авбал зохих шаардлагатай  вэ гэдгийг УИХ-ын гишүүн Ч.Хүрэлбаатараас тодрууллаа. 

Тэрбээр "2021 онд энэ оны төсвийг хэлэлцэж байх үед Монголбанк мөнгөний бодлогын хүүгээ өсгөх шаардлагатай гэдэг саналыг тавьж байсан. Яагаад мөнгөний бодлогыг өсгөх шаардлагатай вэ гэвэл бодлогын хүү төгрөгийн үнэ цэнийг харуулдаг. Инфляци 16-17 хувьд байхад мөнгөний бодлогын хүү 6.5 хувьтай байгаа нь маш бага. Энэ нь эргээд төгрөгийн ханшид дарамт өгдөг. Дараа нь валютын нөөцөө бууруулах эрсдэлд хүргэдэг. Өнгөрсөн жил энэ тухай хэлж байсан боловч харамсалтай нь Монголбанк хүлээж аваагүй. Монгол Улсын эдийн засгийг хөдөлгөдөг үндсэн хоёр бодлого л байдаг. 

• Нэгдүгээрт, төсвийн бодлого
• Хоёрдугаарт, мөнгөний бодлого 

Гэвч мөнгөний бодлогын зохист арга хэмжээг авахгүй цаг алдлаа гэж харж байна. Мөнгөний бодлогын хүүг нэг хувиар өсгөөд одоо ямар ч нэмэргүй. Англи улс гэхэд дөрвөн сарын хугацаанд бодлогын хүүгээ гурван удаа өсгөлөө, дахиад ч өсгөх гэж байна. Дэлхийн ихэнх орон бодлогын хүүгээ өсгөж байна гэсэн үг.  Энэ нь тухайн улс үндэсний мөнгөн тэмдэгтийнхээ үнэ цэнийг бэхжүүлэх,  хамгаалах арга хэрэгсэл юм. Өнөөдөр инфляц 17 орчим хувьтай байгаа тохиолдолд бодлогын хүүг 10 хувиас дээш гаргаж нэмэх шаардлагатай. Үндсэндээ Монголбанк хэтэрхий удаан ажиллаж, цаг хугацаа их алдаж байна. Бодлогын арга хэмжээнүүдийг цаг хугацаанд нь аваагүйгээс өнөөдөр ийм нөхцөл байдалд хүрлээ" гэв.

Харин Монголбанк тайлбартаа “Банкны тухай хуульд зааснаар Төв банк нь арилжааны банкуудын дотоод үйл ажиллагаанд оролцохыг хориглодог. Өөрөөр хэлбэл, Монголбанкнаас дуудлага худалдаагаар банкуудад валют олгодог ч цаашаа хэнд хэдийг өгөх талаар хязгаарлалт, чиглэл гаргадаггүй. Харин иргэдийн зүгээс банкууд валют зарахгүй лимит тогтоолоо гэдэг нь ташаа” гэсэн тайлбарыг өгсөн.