Ц.Даваасүрэн: Эрчим хүчний яам Хөгжлийн банкны зээлийг төлөхийн тулд цахилгаан, дулааны үнийг нэмэхээс өөр аргагүйд хүрнэ

УИХ-аас байгуулагдсан Хөгжлийн банкны шалгалтын явцын талаарх мэдээллийг ажлын хэсгийн гишүүн Ц.Даваасүрэнгээс тодрууллаа. Хөгжлийн банкны чанаргүй зээлийн гуравны нэгийг төрийн өмчит компаниуд эзэлж байгаа юм.

 Энэ тухай ажлын хэсгийн гишүүн хэлэхдээ "Төр өөрөө санхүүжүүлж чадаагүйгээс Хөгжлийн банкнаас зээл авсан байдаг. Тухайлбал эрчим хүчний үнэ тарифыг барьчихсан учраас дөрөвдүгээр цахилгаан станцын шинэчлэлтийг хийж чадаагүй. Ашиг, алдагдалгүй байх тэр түвшинд л ажиллаж байна. Энэ жил  78 тэрбум төгрөгийн алдагдалтай ажиллаж байх жишээний. Ийм байхад эрчим хүчний салбар яаж засвар үйлчилгээ, хөрөнгө оруулалтын ажлыг хийх юм бэ. Жил бүр эрчим хүчний хэрэглээ 60-80 мегаваттаар нэмэгдэж байна. Энэ хэрээр цахилгааны эх үүсвэр шаардлагатай. Хөгжлийн банкны зээлээр дөрөвдүгээр цахилгаан станцад өргөтгөл хийж, 90 мегаваттын эх үүсвэрийн хүчин чадлыг бий болгосон. Мөн Амгалан дулааны станц хэрэгтэй юу гэвэл хэрэгтэй. Төр өөрөө төсвөөс хийж чадахгүй нь үнэн шүү дээ. ДЦС-3 дээр мөн нэг блок барьсан. Энэ бүгдээр жил бүр шинээр бий болсон эрчим хүчний хэрэглээг хангасан. Хэрэв үүнийг хийгээгүй байсан бол орой бүр тог таслах байсан, үүнд Хөгжлийн банкны зээлийн ач холбогдол байсан. Хөгжлийн банкны зээлийг төлвөл эрчим хүчний үнэ тухайн зээлийг төлөх хэмжээгээр өснө. Ард түмэн, ААН-үүдийн бүтэн жилийн тог, цахилгааныг төрөөс төлж болж байхад хэдэн станцынхаа мөнгийг төр төлөх л хэрэгтэй. Цахилгаан, дулааны үнийг нэмэхгүйгээр Хөгжлийн банкны зээлийг төлүүлье гэж байгаа бол төр хариуцахаас өөр аргагүй" гэв. 

Хөгжлийн банкнаас ДЦС-4 ТӨХК 244 тэрбум төгрөгийн, Эрчим хүчний яам 45 тэрбум төгрөгийн зээл авч байсан билээ.