Дэлхийн худалдааны байгууллагын тэргүүн Нгози Оконжо-Ивеала нь Британийн “Guardian” сонинд өгсөн ярилцлагадаа Украйны нөхцөл байдлын улмаас ядуу орнуудад өлсгөлөнд нэрвэгдсэн хүмүүс үймээн самуун дэгдээж болзошгүй гэжээ.
Тэрээр “Украйны нөхцөл байдал энэ жил болон дараа жил хүнсний бүтээгдэхүүний үнэд ихээхэн нөлөөлнө. Хүнсний бүтээгдэхүүн, шатахуун хоёр нь дэлхий даяар ядуу хүмүүсийн хэрэглээний сагсан дах хамгийн чухал хоёр зүйл байдаг. Хамгийн их хохирол амсах нь ядуу улс орнууд ба тэнд аж төрж байгаа ядуу хүмүүс” гэжээ.
Түүнчлэн Африк тивийн 35 улсын хүнсний аюулгүй байдал Хар тэнгисийн бүс нутгаас нийлүүлдэг хүнснээс хамааралтай байдгийг Оконжо-Ивеала онцлоод “Дайны үр дагаврыг хэрхэн зөөллөх талаар одоогоос бодож эхлэхгүй бол энэ жил төдийгүй дараа жил гамшиг, сүйрэлтэй нүүр тулгарна” гэжээ.
Үүнээс гадна 2000 оны эхээр дэлхий даяар хүнсний бүтээгдэхүүний үнэ огцом өсөхөд ядуу улс орнуудад өлсгөлөнд нэрвэгдсэн хүмүүс үймээн дэгдээж байсантай адил зүйл болж магадгүй гэдгийг Нгози Оконжо-Ивеала онцолсон байна. Мөн ОХУ-ыг Украйнд байлдааны ажиллагаа явууллаа гэж Дэлхийн худалдааны байгууллагаас хасах нь боломжгүй гэж мэдэгджээ. Учир нь ОХУ-ыг ДХБ-аас хөөхийн тулд гишүүдийнх нь 75 хувийн дэмжлэгийг авах ёстой болох юм байна.
Сэтгэгдэл (0)
Сэтгэгдэл бичигдээгүй байна