Ч.Хүрэлбаатар: Монголбанк долларын ханш худал зарлаад байна

УИХ-ын нэгдсэн чуулганаар “Тогтоолын хавсралтыг шинэчлэн батлах тухай” тогтоолын төслийг хэлэлцэх үеэр УИХ-ын гишүүн Ч.Хүрэлбаатар дараах байр суурийг илэрхийлсэн юм. 

Тэрбээр "Нэг асуудал ярих гэж бүх сайд нарыг дуудах ямар шаардлага байгаа юм бэ. Ажлыг нь хийлгүүл л дээ.  "2022 онд тулгамдаж байгаа гол асуудал бол бараа бүтээгдэхүүний үнийн өсөлт.Нийлүүлэлттэй холбоотой үнийн өсөлт. Урд хил амархан нээгдэх юм шиг бодох хэрэггүй. Би аравдугаар сард 2022 онд хил нээгдэхгүй шүү гэж хэлж байсан. Энэ жилдээ бүх зүйл амархан дуусаж, хэвийн болно гэж бодох хэрэггүй. 2022 оны байдал 2023 онд ч  үргэлжилнэ. Ийм нөхцөл байдалтай байхад бодлогын арга хэмжээнүүдээ шуурхай авмаар байна. 

Одоо доллар олдохгүй байгаа. Монголбанкны ханш худлаа байна. Долларын ханш Монголбанк дээр нэг өөр, Найман шарга дээр нэг өөр байна. Ийм хоёр өөр ханштай байна гэж юу гэсэн үг вэ. Үүнийг засахгүй бол болохгүй. Доллар олдохгүй байна, 100 доллар ч шилжүүлж чадахгүй байна шүү дээ. Доллар хаанаас яаж олох вэ. Ийм нөхцөл байдалтай байхад Эдийн засаг, хөгжлийн яам үүнийг ярихгүй, цаг алдаж байна" гэлээ.