Хөгжлийн банкны асуудлаар Н.Мөнхбат, Б.Шинэбаатар, Ч.Отгочулуу нарыг цагаатгасан шийдвэрийг хүчингүй болгож, анхан шатад шилжүүллээ

Сүхбаатар дүүргийн Эрүүгийн хэргийн анхан шатны шүүхээс Хөгжлийн банкны гүйцэтгэх  захирал асан  Н.Мөнхбатыг хоёрдугаар сарын 23-нд нэг сар цагдан хорих шийдвэр гаргасан. Улмаар түүнийг цагдан хорих хугацаа  дуусч энэ долоо хоногт дахин нэг сар сунгасан.

Хөгжлийн банкны гүйцэтгэх захирал асан Н.Мөнхбат, ТУЗ-ийн дарга байсан  Б.Шинэбаатар,  ТУЗ-ийн гишүүн асан Ч.Отгочулуу  нарт холбогдох хэргийг Сүхбаатар дүүргийн Эрүүгийн хэргийн анхан шатны шүүхийн 2021 оны арваннэгдүгээр дүгээр сарын 09-ний өдрийн шүүх хуралдаанаар хэлэлцэж шийтгэх тогтоол гаргасан. Ингэхдээ шүүхийн шийтгэх тогтоол гэсэн тэргүүтэй хэдий ч дугаарлахдаа шүүхийн цагаатгах тогтоолын дугаар өгсөн байдаг.

Прокурорын яллах дүгнэлтээр дээрх иргэд нь холбогдох хууль, журмыг зөрчин албан үүрэг, бүрэн эрх, албан тушаалын байдлаа урвуулан ашиглаж Монгол Улсын Хөгжлийн банканд хохирол учруулсан гэж үзэж шүүхэд шилжүүлсэн,

 Дараах үйлдлүүдэд гэм буруутай гэж яллах дүгнэлтэд дурдсан байдаг. Тодруулбал, 

• Банканд хүүтэйгээр байршиж байсан мөнгөн хөрөнгө, эх үүсвэрийг буцаан татах шийдвэрийг бие даан гаргаж 102 удаагийн үйлдлээр 3,653,839,974.78 төгрөгийн их хэмжээний хохирол учруулсан;
•  Худалдаа, хөгжлийн банканд давуу байдал бий болгож зах зээлийн ханшаас өндөр үнээр үл хөдлөх эд хөрөнгө /3,240 мкв оффисын байр, 10 ширхэг зогсоол/ худалдан аван их хэмжээний хохирол учруулсан. /27,598,081,637,2 төгрөгөөр худалдан авсан/
•  “Мон Лаа” ХХК-д давуу байдал бий болгосны улмаас их хэмжээний хохирол учруулсан; /3,000,000 ам.доллартай тэнцэх хэмжээний зээл олгосон/

  Анхан шатны шүүх дээрх үйлдлүүдээс “Мон Лаа” ХХК-д холбогдох асуудалд Н.Мөнхбатыг гэм буруутай гэж үзсэн боловч хөөн хэлэлцэх хугацаа дууссан үндэслэлээр хариуцлагаас чөлөөлсөн. “Мон Лаа” ХХК-аас зээлийн төлбөрийг гаргуулахаар шийдвэрлэж, бусад асуудлыг гэмт хэргийн шинжгүй үндэслэлээр хэрэгсэхгүй болгож шийдвэрлэсэн.

 МУХБ-наас шийтгэх тогтоолыг гардан авснаас хойш хуулийн хугацаанд давж заалдах гомдлыг гаргасан. Харин уг хэрэгт яллах дүгнэлт үйлдэж шүүхэд шилжүүлсэн прокурорын зүгээс шүүхийн шийтгэх тогтоолд эсэргүүцэл гаргаагүй. Энэ нь өөрсдийн байр сууринаас буцсан эс үйлдэл гэж ойлгогдож байгаа юм. 

Нийслэлийн Эрүүгийн хэргийн давж заалдах шатны шүүх МУХБ-ны гомдлыг хянаад 2022 оны гуравдугаар  сарын 30-ны өдрийн шүүх хуралдаанаар анхан шатны шүүхийн шийтгэх тогтоолыг хүчингүй болгож, дахин хянуулахаар анхан шатны шүүхэд буцаасан.

 Улсын яллагч буюу прокурорын зүгээс шүүх хуралдаанд анхан шатны шүүхийн тогтоолыг үндэслэлтэй, МУХБ-ны гомдлыг үндэслэлгүй гэж үзэж байгаагаа мэдэгдэж, төрийн өмнөөс гаргасан яллах дүгнэлтээсээ ухарсан үйлдэл дахин гаргасан.

 Хуулийн дагуу давж заалдах шатны шүүхийн шийдвэрийг уншиж сонсгосноос хойш 15 хоногийн дотор шийдвэрийг албажуулж оролцогчдод гардуулах юм.