Н.Алтанхуяг: Эрдэнэт үйлдвэрийн хүдрийн овоолгын 33 хувийг Орхон аймгийн иргэд хүртдэг болно

“Эрдэнэт үйлдвэр” Төрийн Өмчит Үйлдвэрийн газрын технологид тохирохгүй хүдрийн овоолгыг ашиглах тухай тогтоолын төслийг УИХ-ын гишүүн Н.Алтанхуяг өргөн барьсан талаар мэдээлэл хийлээ. Тэрбээр  “Эрдэнэт” уулын баяжуулах үйлдвэрээс өнөөдрийн технологид таардаггүй зэсийн хүдрийг овоолоод байдаг юм. Тэгэхээр овоолгыг цаашид хэрхэн эдийн засгийн  эргэлтэд оруулах вэ гэдэг талаар УИХ-ын тогтоолын төсөл өргөн мэдүүллээ. Өнөөдөр 20 орчим овоого байгаа. Хоёр ч үйлдвэр байгуулсан. Одоо цэгцлэх шаардлагатай. Учир нь үе үеийн Эрдэнэт уулын баяжуулах үйлдвэрийн даргын үзэмжээр эсвэл манай том дарга нар Ерөнхийлөгч, Ерөнхий сайд нарын зиндаанд үйлдвэр байгуулах асуудлыг шийддэг байсан учраас УИХ-ын тогтоолын төслийг гаргах шаардлагатай байна. Овоолго ашиглаж үйлдвэр байгуулдаг байдлыг таслан зогсооно. 

Тогтоолын төсөл батлагдвал овоолго ашиглаж буй үйлдвэрийн 34 хувийг Эрдэнэт үйлдвэр, 33 хувийг Орхон аймаг буюу Эрдэнэт хот, үлдсэн 33 хувийг байгалийн баялгийн хажууд байгаа ард иргэд эзэмшдэг байдлаар тогтоолын төслийг өргөн мэдүүллээ” гэлээ.

Тогтоолын төслийг бүрэн эхээр нь: 

1/“Эрдэнэт үйлдвэр” ТӨҮГ-ын технологид тохирохгүй хүдрийн овоолгыг эдийн засгийн эргэлтэнд оруулах ажлыг эрчимтэй явуулах;

 2/хүдрийн овоолгыг боловсруулах үйлдвэр байгуулах хөрөнгө оруулалтыг бүрэн шийдвэрлэж, үйлдвэрлэлийн үйл ажиллагааг эхэлснээс хойш 7-оос илүүгүй жилийн дотор өөрийн эзэмшиж буй хувьцааг компанид эргүүлэн өгөх нөхцлийг хүлээн зөвшөөрсөн хөрөнгө оруулагчийг нээлттэй шалгаруулан катодын цэвэр зэс үйлдвэрлэх хуулийн этгээдийг хаалттай хувьцаат компанийн хэлбэрээр байгуулах;

 3/хаалттай хувьцаат компанийн хувьцааны 34 хувийг “Эрдэнэт үйлдвэр” ТӨҮГ, 33 хувийг хөрөнгө оруулагч /тогтоолын 2-т заасны дагуу шалгарсан аж ахуйн нэгж/, 33 хувийг Орхон аймагт оршин суугаа иргэн хамтарсан санд өөрийн хүсэлтээр нэгдэж орсноор эзэмшүүлэх;

 4/энэ тогтоолын 2-т заасны дагуу хөрөнгө оруулагчийн эзэмшилд байгаа 33 хувийн хувьцааг компанид эргүүлэн өгсөн үед давуу эрхийн хувьцаагаар сольж Орхон аймгийн орон нутгийн өмчид шилжүүлэх;

 5/орон нутгийн өмчлөлд шилжүүлсэн давуу эрхийн хувьцааны ногдол ашгийг зөвхөн дараах зориулалтаар зарцуулах; Үүнд:

 а/Орхон аймгийн иргэдийн амьдрах орчныг сайжруулах хөрөнгө оруулалтад;

 б/Орхон аймаг дахь жижиг дунд үйлдвэрлэлийг дэмжиж хөнгөлөлттэй зээл олгоход.

 6/Орхон аймагт оршин суугаа иргэн дараах шалгуурыг хангасан иргэн хамтарсан санд өөрийн хүсэлтээр нэгдэж орох;

 а/2022 оны 06 дүгээр сарын 01-ний өдрийн байдлаар Орхон аймагт тасралтгүй 5-аас доошгүй жил оршин суусан;

 б/Орхон аймагт төрсөн, 2022 оны 06 дүгээр сарын 01-нээс хойш 5 нас хүрсэн,  эцэг эх нь Орхон аймагт албан ёсоор оршин сууж байгаа.

 7/энэ тогтоолын 3-т заасан хамтарсан сангийн дүрэмд дараах нөхцөлд иргэдийн хувьцаа эзэмших эрхийг дуусгавар болгох асуудлыг тусгах; Үүнд:

 а/иргэн Орхон аймгаас шилжиж оршин суух бүртгэлээс албан ёсоор хасагдсан;

 б/иргэн нас барсан.

 8/иргэдэд ноогдол ашиг тараахдаа бэлэн мөнгө хувиарлахгүй байх зарчмыг баримтлан дараах зориулалтаар олгох:

 а/иргэд орон сууцны зээл, хүүгийн төлбөрөө төлөх;

б/хүүхдийн сургалтын төлбөр төлөх;

в/эмчилгээний зардал төлөх;

г/даатгалын хураамжийн төлбөр төлөх.

 9/ногдол ашгийн үлдэгдэл мөнгийг цаашид баталгаатай өсгөх зорилгоор эрсдэлээс хамгаалагдсан хөрөнгө оруулалтын санд төвлөрүүлэх.

 2.Энэ тогтоол хүчин төгөлдөр болохоос өмнө хүдрийн овоолго ашиглан үйл ажиллагаа явуулж байгаа бүх компанийг тогтоол батлагдсан өдрөөс эхлэн 1 жилийн хугацаанд энэхүү тогтоолд нийцүүлэн өөрчлөн зохион байгуулах.

 3.Энэ тогтоолыг 2022 оны 05 дугаар сарын 02-ний өдрөөс эхлэн дагаж мөрдсүгэй.