УИХ-ын чуулганы нэгдсэн хуралдаанаар өнөөдөр /2022.04.15 / Тагнуулын байгууллагын тухай хуульд нэмэлт, өөрчлөлт оруулах тухай хуулийн төслийг баталлаа.
Энэ талаар Батлан хамгаалахын сайд Г.Сайханбаяр мэдээлэл хийв.
Тэрбээр " Засгийн газраас өргөн мэдүүлсэн Тагнуулын байгууллагын тухай хуульд нэмэлт, өөрчлөлт оруулах хуулийн төслийг дөнгөж сая УИХ-аар баталлаа. Уг хуулийн үндсэн үзэл санаа нь одоогоос долоон жилийн өмнө Зэвсэгт хүчний жанжин штабын үндсэн бүтцэд байсан Цэргийн тагнуулын газрыг ТЕГ-ын бүтцийн нэгж болгон шилжүүлсэнтэй холбоотой гарсан гажуудлыг арилгахад оршиж байсан.
Учир нь Зэвсэгт хүчний, цэргийн мэргэжлийн тагнуулын тогтолцоо болон залгамж халаа алдагдсан. Эдгээр шийдвэр нь буруу байсан. Засах зайлшгүй шаардлага байсныг УИХ өнөөдөр залрууллаа. Өнгөрсөн хугацаанд Монгол Улсын Зэвсэгт хүчин цэргийн тагнуулын байгууллаггүй байлаа. Энэ бол цэргийн мэргэжлийн удирдлагын дээд байгууллага нь. Цэргийн мэргэжлийн хувьд өөрийн нүдгүй, чихгүй болсонтой адилхан байсан. Одоо хууль батлагдсанаар ЗХЖШ-ын үндсэн бүтцэд Цэргийн тагнуулын албыг дахин байгуулах Засгийн газрын шийдвэр гарна. Тагнуулын мэргэжлийн албан тушаалтнууд бүх анги, нэгтгэлд томилогдоно. Ингэснээр ҮАБЗ-ийн гишүүд, төр засгийн удирдлагуудыг олон улсын цэрэг, улс төрийн нэн шаардлагатай мэдээллээр хангах ажил хуулийн дагуу явагдана.
Энэ хууль Монгол Улсын зэвсэгт хүчний тогтолцооны гажуудлыг зассан, чухал хууль боллоо.
Өнгөрсөн долоон жилийн хугацаанд бид долоон жилийн турш цэргийн тагнуулуудаа өөр анги нэгж рүү шилжүүлэх байдлаар арга хэмжээ авсан ч хүний нөөцийн бодлого алдагдсан" гэв.
Сэтгэгдэл (0)
Сэтгэгдэл бичигдээгүй байна