Б.Минжүүр: Iphone гар утастай болохыг хүсдэг хүүгийнхээ мөрөөдлийг аав, ээж нь биелүүлсэн

Хүүдээ iphone бэлэглэж гэнэтийн бэлэг барьж, хүү нь баярлан уйлж байгаа хайр татсан бичлэг олон нийтэд ихэд хүрээд буй юм. Бид хүүдээ гэнэтийн бэлэг барьсан ээж Б.Минжүүртэй цөөн хором ярилцлаа.

Танайх Сэлэнгэ аймагт амьдардаг юм уу?

-Сэлэнгэ аймгийн Ерөө суманд амьдардаг. Хүү маань Сэлэнгэ аймгийн Ерөө сумын Бямбаагийн нэрэмжит 12 жилийн наймдугаар ангид сурдаг, Б.Давааням гэдэг. Доод талынх нь дүү 11 настай тавдугаар анги, бага дүү 5 настай. Хүү маань хоёр дүүгээ сайн хардаг. Дээрээ хоёр ахтай миний хүү айлын дундах хүү. 

Хүү нь өмнө нь утас авах талаар ярьдаг байсан юм уу?

-Миний хүү өмнө нь s7 барьдаг байсан. Утас нь жаахан муудчихсан байсан болохоор iphone барьж үзэх юмсан гээд ярьдаг байсан юм. Ээж, аав хоёр нь ярилцаж байгаад iPhone 7 Plus авч өгсөн. Хүү маань анх удаа утас бэлгэнд авсан болохоор баярлаад уйлсан байх.

Хүү нь гэрийнхээ бүх ажилд тусладаг гэж байсан?

-Тийм, гэрийнхээ бүх ажилд туслана. Гэрээ цэвэрлэнэ, хоолоо хийнэ, усаа авна, хоёр дүүгээ харна. Миний хүү чинь мундаг ажилтай хүү.

Хүү нь их зөөлөн, хөөрхөн хүү байсан хүмүүжил, хандлагад нь ээж, аав нь яаж анхаардаг вэ?

-Хүмүүжилд нь айхтар санаа зовдоггүй. Учир нь хүүхэд бол аав, ээжийн тусгал. Өөрсдөө л үлгэр дууриал болохыг хичээдэг.  
 Цаг, зав гаргаж ярилцсан танд баярлалаа.