Хойд Солонгост коронавирусийн анхны тохиолдол илэрч, хөл хорионы дэглэм тогтоохыг тушаажээ

БНАСАУ-д COVID-19 халдварын анхны тохиолдол бүртгэгдсэн тухай Өмнөд Солонгосын Yonhap агентлаг мэдээллээ. Ийнхүү Хойд Солонгост анх удаа коронавирусын халдварын тохиолдол илэрлээ. Өмнө нь Хойд Солонгосын эрх баригчид тус улсад тахал гараагүй гэж мэдэгдэж байсан билээ. Хойд Солонгост илэрсэн анхны Ковид-19 халдвар нь Пхеньянд халуурсан иргэдээс тавдугаар сарын 8-нд авсан шинжилгээний хариугаар омикроны төрлийн коронавирустэй болох нь тогтоогдоод байна.

Хойд Солонгосын Хөдөлмөрийн намын Төв хорооны Улс төрийн товчооны хурлыг зарлан хуралдуулж, БНАСАУ-ын удирдагч Ким Чен Ун оролцжээ. Тэрбээр бүх хот, бүс нутагт хөл хорионы дэглэм тогтоохыг тушааж, халдварын тархалтыг богино хугацаанд бүрэн зогсоох шаардлагатай гэдгийг онцлов.
"2020 оны хоёрдугаар сараас өнөөдрийг хүртэл хоёр жил гурван сарын хугацаанд Ковид-19 тахал өвчний эсрэг онцгой фронтоор хамгаалагдсан манай улсад онц байдал үүсээд байна” хэмээн тус улсын эрх баригчид онцолжээ.