Орхон аймаг 2021 оны ажлаараа манлайлагч аймгаар шалгарлаа

Монгол Улсын Засгийн газрын үйл ажиллагааны хөтөлбөр, хууль тогтоомжийг орон нутагт амжилттай хэрэгжүүлж, 2021 оны ажил, нийгэм, эдийн засгийн үзүүлэлтээрээ Орхон аймаг Эрдэнэт хот шилдэг, тэргүүний аймгаар шалгарлаа.

Орхон аймаг нь 2021 онд цар тахлын нөхцөлд ч гадаадын хөрөнгө оруулагчидтай төсөл, хөтөлбөр хэрэгжүүлэх талаар санал солилцож, хэлэлцсэн төслүүд нь амжилттай хэрэгжихээр болжээ. Мөн орон нутгийн хөрөнгө оруулалтаар “Орлогод нийцсэн орон сууц” төслийг эхлүүлж, 40 гаруй жилийн насжилттай инженерийн шугам сүлжээг шинэчлэх, сайжруулах ажлыг эхлүүлсэн төдийгүй Монгол Улсын Ерөнхийлөгчийн санаачилсан “Тэрбум мод” үндэсний хөдөлгөөн, Засгийн газраас хэрэгжүүлж буй “Цахим үндэстэн” болох зорилтыг хэрэгжүүлэхэд бусад аймгуудаа тэргүүлэн ажиллаж байна.
Ийнхүү шилдэг аймаг болсон нь Орхон аймаг, Эрдэнэт хотын 106 мянга гаруй иргэд, “Эрдэнэт үйлдвэр” ТӨҮГ тэргүүтэй татвар төлөгч 8000 гаруй аж ахуйн нэгж байгууллага, 4000 гаруй төрийн албан хаагчид, нийт Эрдэнэтчүүдийн шагнал гэдгийг аймгийн удирдлагууд онцолж байлаа.