УИХ-ын чуулганы \2022.06.03\-ны өдрийн нэгдсэн хуралдаанаар Төр, хувийн хэвшлийн түншлэлийн тухай хуулийн төслийг хэлэлцлээ. Хэлэлцсэн хуулийн төсөлтэй холбогдуулан УИХ-ын гишүүд асуулт асуулаа.
УИХ-ын гишүүн Ж.Ганбаатар:
2010 оноос хойш УИХ-ын тогтоолоор концессийн ажил явж байсан. Өнөөдрийг хүртэл Төр, хувийн хэвшлийн түншлэлээр барьж, ашиглаад шилжүүлсэн төсөл хөтөлбөр хэрэгжсэн нь бага. Үүнийгээ сайжруулах гэж хуулийн төсөл оруулж ирлээ гэж ойлголоо. Хувийн хэвшлийг энэ ажилд хэрхэн татан оролцуулах вэ, итгэлийг өгөх вэ, Засгийн газар баталгаа гаргах юм уу, хуулиар ямар хамгаалалтаар төр хувийн хэвшлийн хүрээнд энэ ажил явах вэ гэдэг нь хамгийн чухал. Түүнээс биш Засгийн газар өөрийнхөө хийх гэж байгаа үйлчилгээний ажлыг өөрийнхөө дарамтнаас багасгаад, сургууль цэцэрлэгийг хувийн хэвшлээр бариулчихъя, тэр үйлчилгээг нь хувийн хэвшилд өгчихье гэсэн санаатайгаар энэ хууль явбал маш буруу.
Миний санаа зовоод байгаа зүйл нь олон нийтийн зориулалттай дэд бүтцүүдийг төр, хувийн хэвшлийн хүрээнд зөв явуулах хэрэгтэй. Нэгдүгээрт, Хэрэглэгчээс тодорхой төлбөрийг аваад ашиглаад, тодорхой хугацааны дараа төрд үнэгүй буцааж өгсөн тохиолдолд хувийн хэвшлийг яаж хамгаалах вэ гэдэг асуудалд хуульд маш дутмаг байна. Үүнд тодорхой баталгаа хэрэгтэй.Гишүүд ч асууж байна.
Хоёрдугаарт, санхүүжүүлэх схемийн хувьд хэрэглэгч төлөх, төрөөс санхүүжүүлэх, холимог гэсэн санхүүгийн гурван тогтолцоо байгаа. Хэрэглэгч төлөх гэдгийг ойлгож байгаа. Төрөөс санхүүжүүлнэ гэдэг чинь бариад шилжүүлнэ гэдэгтэй ав адилхан сонсогдоод байна. Тэгэхээр төрөөс санхүүжилнэ гэдэгт нь хуульд хугацааны хаалт хэрэгтэй. Үүнд анхаарах хэрэгтэй. Хамгийн гол хувийн хэвшлийн итгэлийг төрүүлэх нь чухал юм шүү. ТОП 100 аж ахуйн нэгжээр шалгарсан компаниуд концесст оролцож нийгмийн хариуцлагынхаа хүрээнд ядаж нийслэл тойрсон хурдны зам, гүүрийг баримаар байна.
Гадны орнуудад хувийн хэвшил нь ямар их зам, гүүр барьсныг бүгд л мэдэж байгаа. Ингэхийн тулд хувийн хэвшилд хийх сонирхлыг нь төрүүлж, оролцуулж мөн баталгаа, хамгаалалт байх хэрэгтэй" гэлээ.
Сэтгэгдэл (0)
Сэтгэгдэл бичигдээгүй байна