Жил бүр Нийслэлийн Нийгмийн ардчилал, Монголын эмэгтэйчүүдийн холбооноос нийгмийн хариуцлагын хүрээнд уламжлал болгон зохион байгуулдаг “ХАРИУ НЭХДЭГГҮЙ БУЯНТАН” хүндэтгэлийн арга хэмжээ Соёлын төв өргөөнд амралтын өдрүүдээр болж өнгөрлөө.
УИХ-ын гишүүн Б. Саранчимэг энэхүү Нийслэлийн НАМЭХ-ийн тэргүүлдэг бөгөөд тэргүүнээр сонгогдсоноосоо хойш 4 дэх удаагаа зохион байгуулж салбар бүрийн манлайлагч 1300 гаруй эмэгтэйчүүдийн төлөөлөл уригдаж оролцлоо.
Тэрээр арга хэмжээг нээж хэлсэн үгэндээ ээжүүд, эмэгтэйчүүдэд хүндэтгэл үзүүлж, талархал илэрхийлээд, “Нийгэмд шударга ёсыг тогтоох, бэхжүүлэх, хүний эрх, эрх чөлөөг дээдэлсэн, тэгш байдлыг хангасан, ил тод, хүнд сурталгүй, хариуцлагатай, хүнлэг, энэрэнгүй бас тунгалаг Монгол төрийг цогцлооход охид, бүсгүйчүүд, эмэгтэйчүүд Та бидний дуу хоолой, зүрх сэтгэл, харилцан дэмжлэг, эв нэгдэл эрхэм чухал. Монголын мянга мянган эмэгтэйчүүд, ээжүүд, охид бүсгүйчүүдийн ирээдүйн эрх, тэгш боломжийн төлөө, шийдвэр гаргах түвшинд дэх эмэгтэйчүүдийн оролцоог нэмэгдүүлэхийн төлөө бүгдээрээ эв санааны нэгдлээр нэгдэн нийлж, нэгнээ дэмжиж, айл өрх бүрт хүртээмжтэй эдийн засгийн ногоон хөгжлийг эрчимжүүлж, үр хүүхдүүдийнхээ амьдрах эрүүл аюулгүй орчныг бүрдүүлж, өөрсдийн ажил хөдөлмөр эрхлэх боломж нөхцлийг төлөө дуу хоолойгоо нэгтгэцгээе” гэсэн уриалгыг гаргав.
Монголын нийгэм дэх эмэгтэйчүүдийн оролцоог нэмэгдүүлэх, эмэгтэйчүүдийн эрхийг баталгаажуулах, улс төр, нийгэм, эдийн засгийн шийдвэр гаргах түвшинд эмэгтэйчүүдийн тэгш эрх, оролцоог хангах, хөгжил дэвшлийн төлөө ажиллаж, бусдад үлгэр дууриалал болсон манлайлагч эмэгтэйчүүдийг "ХҮНДЭТ ЭМЭГТЭЙ" өргөмжлөлөөр шагнаж урамшуулсан байна.
Мөн үдээс хойш нь манлайлагч 300 гаруй ээжүүд, эмэгтэйчүүд, бүсгүйчүүдэд эмэгтэйчүүдийн хөгжлийн сургалтыг зохион байгуулж, Рояаль Олон Улсын Их сургуулийн Ерөнхий захирал Ч.Сэлэнгэ “ЭМЭГТЭЙЧҮҮДИЙН МАНЛАЙЛАЛ” сэдвээр, мөн НҮБ-ын Аж үйлдвэржилтийн хөтөлбөрийн (UNIDO) Монгол дахь хөтөлбөрийн зохицуулагч Г.Мөнхболор “Уламжлалт нүүдлийн МАА-д үйлдвэржилтийг нэвтрүүлэх боломж, үр ашиг” сэдвүүдээр лекц уншиж, сонирхолтой яриа өрнүүлж, Үндэсний цэцэрлэгт хүрээлэнгийн бүтээн байгуулалттай танилцаж, “Итгэлийн төгөл”-д мод усаллаа.
УИХ-ын гишүүн Б.Саранчимэг нь эмэгтэйчүүдийг шийдвэр гаргах түвшинд гаргах тал дээр идэвхитэй ажилладаг гишүүдийн нэг бөгөөд тэрээр хэлэхдээ “Монголын нийгэмд эмэгтэйчүүд манлайлал, харилцан дэмжлэг их чухал байна” гэлээ.
Сэтгэгдэл (0)
Сэтгэгдэл бичигдээгүй байна