Улсын төсвийн хөрөнгөөр шинээр ашиглалтад орсон Нийслэлийн лаборатори нэгдүгээр сургуулийн заал дөрөвхөн сар хичээллээд шалнаасаа цөмөрчээ. Тодруулбал, 2022 оны хоёрдугаар сард ашиглалтад орсон тус сургуулийн өргөтгөлийн байрны зааланд хүүхдүүд дөрөвхөн сар хичээллэсэн атал шалнаасаа цөмөрч, нуржээ.
ВИДЕО ҮЗЭХ:
Тус сургуулийн өргөтгөлийн барилгыг улсын төсвийн 3.5 тэрбум төгрөгийн хөрөнгөөр барьж ашиглалтад оруулсан байна. Энэ талаар тус сургуулийн захирлын хэлсэн мэдээллээр "Анх 2018 онд барилгын ажил эхлэх үед улсын төсөвт 2.5 тэрбум төгрөгийн төсөв суулгаж байжээ. Гэвч төсөв нь хүрэлцээгүйгээс барилгын ажил жил гаруйн хугацаанд зогссон учир Сүхбаатар дүүргээс сонгогдсон УИХ-ын гишүүдэд хандаж, 2021 оны улсын төсөвт 1 тэрбум төгрөг нэмж суулгуулж өргөтгөлийн барилгыг энэ оны хоёрдугаар сард ашиглалтад оруулсан байна. Өргөтгөлийн барилга нь гурван давхар бөгөөд номын сан, урлаг, спортын заал, сургалтын анги танхим, мэдээлэл технологийн танхимууд хичээллэдэг.
Энэ талаар Сүхбаатар дүүргээс сонгогдсон УИХ-ын гишүүн Д.Цогтбаатар хэлэхдээ "Нэгдүгээр сургуулийн байрыг өргөтгөх хүрээнд 2018 онд улсын төсөвт 2.5 тэрбум төгрөг тавигдаж байсан. Гэвч мөнгө нь хүрэхгүй ажил нь зогссон учраас миний бие хөөцөлдөж, нэмэлт төсвийг нь суулгуулсан. Гэтэл оны дараахан ашиглалтад орсон заал нурж, цөмөрсөн байдалтай байна. Анхнаасаа заалны төсөв нь бага тавигдсан гэж яриад байж болохгүй. Багахан төсвөөр хийгдэх байлаа ч гэсэн хүүхдийн орчныг ийм муу барьж болохгүй шүү дээ. Сургуулийн удирдлагын зүгээс холбогдох мэргэжлийн байгууллагуудад хандаж, заалны материал чанартай, стандарт эсэхэд хяналт тавих хэрэгтэй. Одоо засварын ажлыг мэргэжлийн байгууллагын хяналт дор хийлгэх ёстой" гэв.
Сэтгэгдэл (0)
Сэтгэгдэл бичигдээгүй байна