Хатан хаан II Элизабетийг оршуулах ёслол өчигдөр (2022.09.19) боллоо. Дэлхийн улс орнуудын 500 гаруй удирдагч, төрийн тэргүүн, язгууртнууд Лондон хотын Уэстминстер Аббей ордонд Их Британийн хатан хаантай салах ёс гүйцэтгэлээ.
Дэлхийн томоохон гүрнүүдийн төлөөлөл болж Японы эзэн хаан Нарухито, АНУ-ын Ерөнхийлөгч Жо Байден, Францын Ерөнхийлөгч Эммануэль Макрон, Германы Ерөнхийлөгч Франк Вальтер Штайнмайер, Хятадын дэд дарга Ван Цишань нар оршуулах ёслолд оролцжээ.
1952 онд хатан хааны эцэг VI Жорж хааныг оршуулах ёслолд ашиглаж байсан тэнгисийн цэргийн хүчний их бууны тэрэгэн дээр II Элизабетийн шарилыг байрлуулан 142 цэрэг Вестминстерийн сүмийг зорьжээ.
Оршуулах ёслолд хаан III Чарльз, эхнэр Камилла, хунтайж Уильям, Харри тэргүүтэй гэр бүлийн гишүүд оролцсон. Мөн олон жилийн турш хатан хааны дэргэд байж үйлчилсэн эзэгтэй нарт урилга очжээ. Тухайлбал, 1960 оноос эхлэн хатан хаанд үйлчилсэн, хунтайж Уильямын загалмайлсан эх болсон Сюзан Хусси, 30 жил хатан хааны хувийн туслах, ахлах хувцаслагчаар ажилласан Анжела Келли нар жагсаалтад багтсан юм.
Их Британи улс сүүлд 1965 онд ерөнхий сайд агсан Уинстон Черчилльд төрийн оршуулга зохион байгуулж байснаас хойш 60 орчим жилийн дараа 70 жил төр барьсан хатан хаандаа ийнхүү хүндэтгэл үзүүллээ.
Элизабет хатан хаан 9 сарын 8-ны өдөр Шотландын Балморал шилтгээнд 96 насандаа таалал төгссөн.
Хатан хаантай салах ёс гүйцэтгэх айл ажиллагаа 10 өдөр үргэлжилсэн. Түүнийг оршуулснаас нь хойш 10 хоногийн дараа Британи даяар гашуудлын хугацаа дуусах юм.
Сэтгэгдэл (0)
Сэтгэгдэл бичигдээгүй байна