Тусгай зөвшөөрлийг шуурхай, хүнд сурталгүй олгох ёстой

Зам, тээврийн хөгжлийн сайд С.Бямбацогт өнөөдөр /2022.10.10/ Монголын Авто замчдын холбооны Ерөнхийлөгч Т.Бямбаа, гүйцэтгэх захирал А.Уранчимэг нарыг хүлээн авч уулзаж, авто замын салбарын өнөөгийн нөхцөл байдал, хүний нөөцийн бодлого, тусгай зөвшөөрөл олгох журам зэрэг асуудлаар ярилцаж, зарим чиглэлийг өглөө.

Сайд С.Бямбацогт “Юуны өмнө та бүхэн үйл ажиллагаандаа ямар ч тохиолдолд хууль зөрчихгүй, хүнд сурталгүй, авлига ашиг сонирхлын зөрчлөөс ангид байх бодлого баримталж ажиллах ёстой. Авто замын компани, аж ахуйн нэгжүүд зөвшөөрөл авах гэж удаан хугацаанд хүлээдэг  байх ёсгүй. Мөн зарим аж ахуйн нэгжүүдэд давуу эрх олгох зэргээр эрх мэдлээ буруугаар ашиглахгүй байж зарчмын шаардлага тавин хамтран ажиллах ёстойг сануулья. Нэгдүгээрт, орчин үед авто замын салбар бүс нутгийн хөгжилд хамгийн чухал болоод байна. Тийм учраас авто зам, гүүрийн инженер, техникийн ажилчид бэлтгэх, ажилчдаа гадаад, дотоодод мэргэжил дээшлүүлж, туршлага хуримтуулахад анхаарна. Хоёрдугаарт, замын норм, дүрэм, стандартыг шинэчлэн батлах зайлшгүй шаардлагатай байна. Ингэхдээ эдийн засгийн үр өгөөж өндөр байхад анхаарч, авто замыг хурдан хугацаанд чанартай барих ёстой. Гуравдугаарт, мэргэшсэн зөвлөх инженер сонгон шалгаруулалтаа сайжруулах шаардлагатай. Дөрөвдүгээрт, авто замын зураг төслийг чанарыг сайжруулж, стандарттай болгож, захиалагч тал өндөр хяналт тавин чанартай зам барих ёстой” хэмээн хэллээ.

Монголын Авто замчдын холбооны Ерөнхийлөгч Т.Бямбаа 2017 оноос хойш 27 хүнийг ХБНГУ-д авто замын мэргэжилтэн бэлтгэхээр сургаж, ирэх онд хамтын ажиллагааны хүрээнд гурван жилийн хугацаатай мэргэжилтэн бэлтгэх болсныг хэлэв.

Зам, тээврийн хөгжлийн сайд С.Бямбацогт Монголын Авто замчдын холбооны зүгээс авто замын хөгжилд хувь нэмэр оруулах санаачилга бүрд боломжит бүх хувилбараар дэмжиж ажиллахаа илэрхийллээ гэж Зам, тээврийн хөгжлийн яамнаас мэдээллээ.