Өнөөдөр олон улсын ядуурлыг бууруулах өдөр

Өнөөдөр олон улсын ядуурлыг бууруулах өдөр тохиож байна. Францын нийслэл Парис хотын Хүний эрхийг тунхаглаж байсан Трокадеро талбайд 1987 оны 10 дугаар сарын 17-нд 100 мянга гаруй хүн цугларч хүчирхийлэл, хэт ядуурал, өлсгөлөнгөөс амь үрэгдэгсдийг дурсан, хүндэтгэл илэрхийлснээр ядуурлын эсрэг хөдөлгөөнийг санаачилжээ.  Тэр цагаас хойш нас, хүйс, гарал үүсэл, шашин шүтлэг, нийгмийн давхаргаас үл хамааран олон улс орны иргэд ядуурлын эсрэг дуу хоолойгоо нэгтгэж ирсэн байна. Олон оронд цуглаан болсон газартаа дурсгалын чулуу босгосон бөгөөд НҮБ-ын төв байрны цэцэрлэгт нэг байдаг ажээ.  НҮБ-ын Ерөнхий ассамблейн чуулганы 1992 оны 12 дугаар сарын 22-ны тогтоолоор энэ өдрийг Ядууралтай тэмцэх олон улсын өдөр гэдгийг албан ёсоор зарлан 1993 оноос зохион байгуулан тэмдэглэж ирсэн юм. 

Манай улсын хувьд хоёр жил тутамд ядуурлын түвшинг тодорхойлох судалгаа хийдэг. Монголын үндэсний статистикийн хорооноос 2020 онд явуулсан судалгаагаар ядуурлын түвшин 27.8 хувь болж, 2018 оныхоос 0.6 нэгж хувиар буурч, ойролцоогоор нийт хүн амын 903.4 мянга нь ядуу амьдарч байна гэсэн судалгаа гарчээ. 

Хот суурин газарт 2018-аас 2020 онд ядуурлын түвшин 0.7, хөдөө орон нутагт 0.3 нэгж хувиар буурсан байна. Нийт ядуу хүн амын 64 хувь нь хот суурин газарт, үүнээс 43 хувь нь Улаанбаатар хотод амьдарч байна.
Цар тахал ядуурлыг бууруулах хурдыг удаашруулсан байна.  Өөрөөр хэлбэл ядуурлын түвшин 2020 онд 2018 оноос бага зэрэг буурсан хэдий ч хэрэв коронавирусийн цар тахал дэгдээгүй байсан бол илүү (3 орчим нэгж хувиар) буурахаар байжээ.