Д.Мөнх-Эрдэнэ: Өнөрөө ахын дүү даваад гарна шүү, хүнд гэмт хэрэгт холбогдсон биш, ах нь аав, ээжид нь сүү бариад очно

Үндэсний эрх чөлөө, тусгаар тогтнолоо сэргээн мандуулсны 112 жилийн ойн өдөр буюу 2023 оны арванхоёрдугаар сарын 29-ны өдөр Монгол Улсын Ерөнхийлөгч У.Хүрэлсүхийн зарлигаар Хөх хотын консул асан Д.Мөнх-Эрдэнэд өршөөл үзүүлж, сулалсан. Түүнийг албан тушаалын байдлаа урвуулан ашиглаж их хэмжээний хохирол учруулсан, хүний нэр төр, алдар хүнд, ажил хэргийн нэр хүндэд халдсан, худал мэдээллийг тараасан хэргээр яллаад байсан юм. 

Д.Мөнх-Эрдэнэ өөрийн цахим хаягаар дамжуулан өнгөрсөн хугацаанд туслаж, дэмжиж байсан иргэд олон нийт, дотны хүмүүстээ баярласанаа илэрхийлж ямар учраас хоригдсон тухайгаа мэдээлсэн. Энэ үеэр тэрбээр сэтгүүлч Н.Өнөрцэцэгийн таслан сэргийлэх арга хэмжээтэй холбоотойгоор үзэл бодлоо илэрхийлэхдээ "Өнөрөө миний дүү зоригтой байгаарай. Өнгөрсөн хугацаанд ахынхаа төлөө сэтгэл гаргаж байсанд маш их баярласан. Гол нь эрүүл байж даваад гарна шүү. Миний дүү ямар хүнд гэмт хэрэгт холбогдсон биш дээ. Даваад гарна гэдэгт ах нь итгэлтэй байгаа. Аав ээж хоёрт нь цайны сүү бариад очно оо, санаа тавина" хэмээсэн юм.