Б.Дэлгэрсайхан: 3-10 саяар таксины зөвшөөрөл авна гэдэг нь худлаа, би давс зэрэгхэн ярьдаг сайд баймааргүй байна

2024 оны аравдугаар сарын 15-наас зөвшөөрөлгүй такси үйлчилгээнд явбал иргэнийг таван сая төгрөгөөр, аж ахуйн нэгжийг 50 сая төгрөгөөр торгох заалтыг тусгаад буй гэдгийг албаныхан мэдээлсэн.

Хотын даргын зөвлөх Ч.Батзориг "Такси үйлчилгээг одоогийн байдлаар Улаанбаатар хотод UB cub дуудлагын үйлчилгээ үзүүлж байгаа. Үүнийг хуульд такси үйлчилгээ гэж үзэхгүй байгаа. Үүнийг дуудлагын үйлчилгээ гэж өөр зохицуулалтаар зааж өгсөн.Аравдугаар сарын 15-аас эхлээд такси үйлчилгээний тусгай зөвшөөрөлтэй болоод эхлэхээр зөвшөөрөлгүй буюу энгийн хүмүүс такси үйлчилгээ хийгээд, түүнтэй холбоотой гэмт хэрэг, ослын харилцаа зохицуулагдаж эхэлсэн. Өөрөөр хэлбэл, хэрвээ зөвшөөрөлгүй такси үйлчилгээ үзүүлбэл хувь хүнийг 5 сая төгрөгөөр, хуулийн этгээдийг 50 сая хүртэлх төгрөгөөр торгох зохицуулалт Зөрчлийн хуульд орсон. Цаашдаа Улаанбаатар хотын удирдлагын зүгээс нийтийн тээврийн олон төрөлт үйлчилгээг нэвтрүүлэх бодлогыг явуулж байгаа. Энэ хүрээнд бид такси үйлчилгээ буюу цахилгаан таксинуудыг үйлчилгээнд нэвтрүүлэх бодлого явж байгаа” гэж байсан юм. 

Тэгвэл УИХ-ын гишүүн Түгжрэлийг бууруулах үндэсний хорооны дарга, сайд Б.Дэлгэрсайхан "Такси үйлчилгээнд явж байгаа иргэдийг бүртгэлжүүлье, албажуулж иргэд итгэлтэй үйлчилгээ авдаг болгоё л гэж байгаа. Түүнээс 3-10 саяар таксины зөвшөөрөл авна гэдэг бол худлаа" гэсэн юм.