Л.Оюун-Эрдэнэ: Метротой болоход эргэлзэх хэрэггүй

"Гэр хорооллыг хөгжүүлэх хөрөнгө оруулалтыг дэмжих хөтөлбөр" төсөл нь Улаанбаатар хотын гэр хорооллын бүсэд нийгмийн болон инженерийн дэд бүтцийг цогцоор шийдсэн зургаан шинэ дэд төвийн ажлыг есөн жилийн хугацаанд гурван үе шаттайгаар хийж хэрэгжүүлнэ.

Тэгвэл өнөөдөр /2024.09.19/ Ерөнхий сайд Л.Оюун-Эрдэнэ Сэлбэ дэд төвийн бүтээн байгуулалттай танилцлаа. Энэ үеэр тэрбээр "Нийслэл Улаанбаатар хотод ердөө ирэх гурван жилийн дотор 30.5 их наяд төгрөгийн хөрөнгө оруулалтыг хийнэ. Өнгөрсөн 30 жилийн хөрөнгө оруулалтаас гурав дахин илүү их хөрөнгө оруулалтыг ирэх гурван жил Засгийн газар хийнэ гэсэн үг. Энэ дотор нийслэлчүүдийн эргэлзэж буй метроны төсөл ч орж байгаа. Тийм учраас метро барих асуудалд эргэлзэх хэрэггүй, санхүүжилт нь шийдэгдсэн. Улаанбаатар хот нарийвчилсан гадны зөвлөх үйлчилгээ болон ерөнхий төлөвлөлтгүй явж ирсэн биш. Гэвч дагаж мөрдөж ирээгүй. Улаанбаатар хот өөрчлөгдөх ганц нууц нь ерөнхий төлөвлөгөөтэй байх. Энэ төлөвлөгөөний дагуу дэлхийн хөгжсөн улсууд явж иржээ" гэв.