Н.Өнөрцэцэгийг өмгөөлөгчгүй шүүсэн анхан шатны шүүхийн шүүгч нарт холбогдох сахилгын хэргийн хурал удахгүй болно

Сэтгүүлч Н.Өнөрцэцэгт холбогдох эрүүгийн хэргийн Давж заалдах шатны шүүх хурал өчигдөр /2024.11.07/ Нийслэлийн Эрүүгийн хэргийн Давж заалдах шатны шүүхэд болсон билээ. 

Тус шүүхээс Н.Өнөрцэцэгт анхан шатны шүүхээс оноосон 4.9 жилийн хорих ялыг хэвээр үлдээх шийдвэр гаргасан юм. Тэгвэл сэтгүүлч Н.Өнөрцэцэгт холбогдох хэргийг анхан шатны шүүхээр шүүсэн шүүгч нарт холбогдох Шүүхийн сахилгын хорооны хурал удахгүй зарлагдана гэдгийг эх сурвалж мэдээллээ. Тодруулбал, Хууль зүй, дотоод хэргийг сайд О.Алтангэрэл өнгөрсөн долдугаар сард "Сэтгүүлч Н.Өнөрцэцэгт холбогдох Эрүүгийн хэргийн анхан шатны шүүх хурлыг явуулахдаа өмгөөлөгчгүй оролцуулж, ял оноож, анхан шатны шүүхийн шүүгч нар ёс зүйн алдаа гаргасан" хэмээн үзэж, Шүүхийн сахилгын хороонд хандаад байсан юм. 

Энэ дагуу ШСХ-ноос уг гомдол мэдээлэлд сахилгын хэрэг үүсгэж, шалгах ажиллагааг явуулж байгаа бөгөөд удахгүй хурлыг товлохоор төлөвлөж байгаа аж. Уг хурлаар анхан шатны шүүхийн шүүгч нар ёс зүйн алдаа гаргасан гэж үзвэл сэтгүүлч Н.Өнөрцэцэг нь "шинээр илэрсэн нөхцөл байдал" хэмээн анхан шатны шүүхийн шийдвэрт гомдол гаргах эрхтэй болох юм.