Өсвөрийн жүдочид Анталиягаас таван медаль хүртлээ

Туркийн Анталия хотод өнгөрсөн амралтын өдрүүдэд болсон жүдо бөхийн өсвөрийн тамирчдын дэлхийн чансааны оноо олгох Европын нээлттэй цомын аварга шалгаруулах тэмцээнээс Монголын тамирчид хоёр мөнгө, гурван хүрэл медаль хүртлээ.

Тодруулбал, охидын 44 кг-ын жинд “Мон-Алтиус Цагаанбаатар” академийн тамирчин Б.Хулан, хөвгүүдийн 73 кг-д “Виннер” дэвжээний тамирчин Б.Далайцэрэн нар мөнгө, охидын 52 кг-д “Виннер” дэвжээний тамирчин Л.Саяжаргал хүрэл, хөвгүүдийн 60 кг-д “Мон-Алтиус Цагаанбаатар” академи, “Таванхан” дэвжээний бөх М.Энхбилэг, 81 кг-д “Мон-Алтиус Цагаанбаатар” академийн тамирчин Б.Тэмүүлэн нар хүрэл медалиар энгэрээ мялаасан бол охидын 44 кг-д Ц.Амин-Эрдэнэ шагналт V байрт шалгарчээ.

Б.Хулан, М.Энхбилэг нарын хувьд үүнээс өмнө Словакийн Саморин хотод болсон тэмцээнээс хүрэл медаль хүртсэн юм.

Энэ удаагийн тэмцээнд Монголын жүдо бөхийн өсвөрийн шигшээ багийн дасгалжуулагч Х.Цагаанбаатар, Г.Отгонцэцэг нарын удирдлагад Б.Хулан, Р.Омар, Б.Тэмүүлэн, Б.Далайцэрэн тэргүүтэй 20 гаруй тамирчин оролцжээ.