Ерөнхий Сайд Н.Учрал: Өвөлдөө өнөөдрөөс бэлдье

Монгол Улсын Ерөнхий сайд Н.Учрал Дулааны IV цахилгаан станц-т ажиллаж, салбарын нөхцөл байдал, өвөлжилтийн бэлтгэлтэй танилцжээ. Түүний хамтаар Эрчим хүчний сайд Б.Найдалаа болон холбогдох албаныхан оролцсон байна.

ДЦС-4 нь төвийн бүсийн цахилгаан эрчим хүчний 49 хувь, Улаанбаатар хотын дулааны 55.2 хувийг хангадаг, системийн оргил ачааллыг үүрдэг стратегийн чухал байгууламж юм.

Станцын удирдлагууд 2026–2027 оны өвөлжилтийн бэлтгэл, хүчин чадал, шаардлагатай хөрөнгө оруулалтын талаар танилцуулжээ. Тус станц өндөр ачаалалтай ажиллаж, импортын эрчим хүчний зардлыг бууруулан бодит хэмнэлт гаргасан байна.

Гэсэн ч дулааны эрчим хүчийг өртгөөс доогуур үнээр нийлүүлж буйгаас алдагдал хүлээж, тарифын шинэчлэл зайлшгүй шаардлагатай байгааг онцоллоо. Хэрэв одоогийн нөхцөл үргэлжилбэл алдагдал цаашид нэмэгдэх эрсдэлтэй байна. Мөн их хэмжээний зээл, засвар шинэчлэлийн санхүүжилтийн хэрэгцээ тулгамдаж байгаа бөгөөд өвлийн оргил ачааллыг найдвартай давахын тулд яаралтай хөрөнгө оруулалт шаардлагатайг дурдав.

Ерөнхий сайд Н.Учрал эрчим хүчний салбарын шинэчлэлийг цогцоор хэрэгжүүлэхээ мэдэгдэж,

• яаралтай засвар үйлчилгээний санхүүжилтийг шийдвэрлэх
• шинэ эх үүсвэрүүд барих
• үнэ тарифыг үе шаттай шинэчлэх
• салбарын ил тод байдал, засаглалыг сайжруулах зэрэг арга хэмжээг авч хэрэгжүүлэхээ илэрхийллээ.

Түүнчлэн өвлийн бэлтгэлийг хангах хүрээнд шаардлагатай санхүүжилтийг шийдвэрлэж, эрчим хүчний салбарыг үе шаттайгаар алдагдалгүй, тогтвортой бүтэц рүү шилжүүлэх зорилт тавьж байгааг онцолсон юм.

Харин Эрчим хүчний сайд Б.Найдалаа салбарыг хүнд суртал, өр төлбөр, үр ашиггүй байдлаас гаргаж, ил тод, нээлттэй тогтолцоонд шилжүүлэхээр ажиллана гэдгээ мэдэгдсэн байна.