Иргэд төрийн өмчийг хянадаг болохын тулд сайн хууль батлахыг шаардах эрхтэй

Өнөөдрийн баялгийн тэгш бус хуваарилалтыг харвал Төрийн өмчийн хууль үүргээ гүйцэтгэж чадаагүй талаар тус хуулийн шинэчилсэн найруулга дээр ажиллаж байгаа УИХ-ын ажлын хэсгийн ахлагч О.Номинчимэг нээлттэй хэлэлцүүлэг дээр хэлсэн нь анхаарал татаж байлаа. Тэгвэл энэ сарын эхэнд хийж байсан хэлэлцүүлгийнхээ хоёрдугаар хэлэлцүүлгийг энэ лхагва гаригт зохион байгуулахаар болжээ. Төрийн ордонд болох "Төрийн болон орон нутгийн өмчийг ашиглуулах, шилжүүлэх зохицуулалт ба өмч хувьчлал" сэдвийн хүрээнд болох энэхүү хэлэлцүүлэг ихэд анхаарал татаж байна. Өнгөрсөн хугацаанд төрийн үнэ цэнтэй өмчүүд орон нутагт үнэгүйдэж ирсэн харамсалтай түүх бий. Түүхийн олдворууд, музейн эд өлгийн зүйлс гээд орон нутгийн эрх дархтны гараар ороод шамшигдсан нь цөөнгүй. Үүнийгээ хянах, бүртгэх тогтолцоо сул, хяналт багаас нийтийн өмч алдагдаж, хэн нэгэн эрх мэдэлтэн завшиж ирсэн. Тийм ч учраас энэ талаар шүүмжлэлтэй ярьж байгаа О.Номинчимэг гишүүн “Эрдэнэсийн сангаа хүртэл нийтийн өмчид бүртгэж аваагүйгээс хосгүй үнэт олдворууд хүртэл эрх мэдэлтнээр дамжиж, иргэдийн гар дээр явж байдаг болсон. Хяналтын механизм байгаагүй нь системийн авлига үүсэх шалтгаан хүртэл болжээ” гэж хатуу хэлсэн биз ээ. Энэ удаагийн хэлэлцүүлгээр өмч хувьчлалын асуудлыг ч хөндөх юм байна.
Өмч хувьчлалууд явагдаад байдаг гэхдээ үнэлсэн үнэлгээнээсээ бага өртгөөр зарагдах, хувьчлалын үеэр амалсан амлалт буюу нэмж хөрөнгө оруулах үйл ажиллагаа нь хийгдсэн эсэхийг огт хянахгүй явж ирсэн. Менежментийн хувьчлал гэж бараг бэлэглэлийн гэрээ шиг хувьчлалууд явагдаж, томоохон их дээд сургуулиудыг зуугаадхан сая төгрөгөөр зарсан асуудлууд ч байдаг. Энэ мэт асуудлууд нь төрийн өмч гэдэг дарга, мэдэлтнүүдийн өмч гэсэн ойлголт бий болоход хүртэл хүрчээ. Харин энэ удаад хуулийг өргөн хүрээнд харж, дараагийн завхралуудаас сэргийлэх хяналтыг бий болгох нь гэсэн хүлээлт олон нийтэд төрөөд байгаа юм. Олон нийтэд нээлттэй хэлэлцүүлгүүд хийж, мэргэжлийн хүмүүс судлаачдыг урьж, үгийг нь авч байгаа бөгөөд ажлын хэсэгт багтсан гишүүд ч анхаарч ажиллаж байгаа нь анзаарагдаж байгаа. Нийтийн өмч бол хэн нэгэн дарга, тэдний танил талын өмч биш харин Монголын иргэн бүрийн өмч учраас бүгд энэ хууль батлагдах үйл явцыг анхааран харж, хэлэлцүүлгүүдэд нь оролцоод явах ёстой. Өмчөө хянахын тулд сайн хууль батлахыг энэ үеэр шаардах ч ёстой. Тиймээс дараахь хаягаар нэвтэрч, бүртгүүлээд хэлэлцүүлэгтээ оролцоорой. Бүртгүүлэх линк нь: "Төрийн болон орон нутгийн өмчийг ашиглуулах, шилжүүлэх зохицуулалт ба өмч хувьчлал" сэдэвт хуулийн төслийн хэлэлцүүлэгт урьж байна

https://www.parliament.mn/nn/7...