Буриад улс руу экспортлох махны хэмжээг 5000 тоннд хүргэж нэмэгдүүлэх санал тавилаа

Хүнс, хөдөө аж ахуй, хөнгөн үйлдвэрийн сайд Ц.Идэрбат даваа гарагт ОХУ-ын Бүгд найрамдах Буриад улсын Засгийн газрын орлогч дарга, Хүнс, хөдөө аж ахуйн сайд А.Д.Дармаевыг хүлээн авч уулзав. Энэ үеэр сайд ОХУ-ын Бүгд найрамдах Буриад улсад Монголын хөдөө аж ахуйн бараа, бүтээгдэхүүний үзэсгэлэн худалдааг зохион байгуулах хүсэлт тавилаа. Евразийн эдийн засгийн чөлөөт худалдааны түр хэлэлцээрт Монгол Улс нэгдсэнээр 367 нэр, төрлийн бүтээгдэхүүнийг Европын зах зээлд татваргүй худалдаалах юм.Үүний 90 хувь нь хөдөө аж ахуйн салбарын бүтээгдэхүүн байгаа. ОХУ-ын Бүгд найрамдах Буриад улсын Засгийн газрын орлогч дарга манайхаас нийлүүлэх махны экспортыг нэмэгдүүлж 5000 тонн-д хүргэх боломжтой, ялангуяа адууны мах авах сонирхолтой байгаагаа илэрхийлсэн. Монгол Улсаас ОХУ руу мах, махан бүтээгдэхүүн экспортлоход тулгардаг хамгийн том бэрхшээл нь малын эрүүл мэнд, хорио цээрийн асуудал. ОХУ-аас манай улсад 200 мянган тун шүлхийн вакциныг шугамаар нийлүүлэхээр болсон нь малын дархлаажуулалт бодитой дэмжлэг болж байна.