Б.Бат-Эрдэнэ: Бөхчүүд ёс жудгаа сахиж, хориотой эм бодисоос хол явах ёстой

Монголын үндэсний бөхийн хүрээнд допингийн асуудалд шударгаар хандах шаардлага улам бүр нэмэгдэж байна. Өмнө нь допинг хэрэглэсэн бөхчүүдтэй бусад нь ямар ч эсэргүүцэлгүйгээр барилддаг, асуудлыг төдийлөн нээлттэй ярьдаггүй байсан бол өнөөдөр нөхцөл байдал өөрчлөгдөж эхэлжээ. Зарим бөхчүүд допингтой холбоотой асуудалд ил тод байр суурь илэрхийлж, хориотой бодис хэрэглэсэн бөхчүүдийг барилдуулахгүй байх санал гаргаж, шударга өрсөлдөөнийг шаардах болсон байна.

Мөн допингийн асуудалтай холбоотойгоор эмчийн акт, шүүхийн шийдвэр гаргуулан тэмцээн уралдааны шийдвэрийг зогсоодог тохиолдлууд ч гарч байсныг бөхчүүд шүүмжилж байна. Үүнээс үүдэн допинг хэрэглэсэн бөхчүүдтэй мэдэлгүйгээр барилдах нөхцөл үүсдэг байжээ.

Түүнчлэн олон улсын тэмцээн уралдаанд оролцох үед допингийн хяналт шалгалт өндөр түвшинд явагддаг тул монгол бөхчүүд үндэсний бөхийн ариун ёс, жудаг, нэр хүндээ хамгаалах ёстойг онцолж байна. Хориотой эм, бодис хэрэглэх, цол наймаалцах, аймаг сумдын наадмыг будлиантуулах зэрэг үйлдлээс татгалзах хэрэгтэйг бөхийн хүрээнийхэн хэлж байна.

“Ард түмний хайр хүндэтгэл, итгэлийг дааж явах ёстой” хэмээн бөхчүүд байр сууриа илэрхийллээ.