ПРОКУРОР ЗУРГААН ШҮҮГЧИЙГ ЯЛЛАГДАГЧААР ТАТАХААС ТАТГАЛЗАВ

АТГ-аас үндэслэлгүйгээр хөрөнгөжсөн байж магадгүй гэсэн нэр бүхий зургаан шүүгчид хэрэг бүртгэл нээн шалгаж эхэлсэн. Тодруулбал, хөрөнгө орлогоо мэдүүлээгүй, дутуу мэдүүлсэн гэх тэдний хөрөнгийн эх үүсвэр хаанаас үүдэлтэй вэ гэдгийг шалгаж эхэлсэн.Түүнчлэн АТГ-ын Мөрдөн шалгах хэлтсээс хоёрдугаар сарын 13-ны өдөр хэрэг бүртгэл нээсэн. Улмаар тэдний бүрэн эрхийг түдгэлзүүлж, яллагдагчаар татаж шалгах саналыг Шүүхийн ерөнхий зөвлөлд уламжлуулахаар Нийслэлийн прокурорын газарт хүсэлт гаргасан байдаг.

Тэгвэл Нийслэлийн ерөнхий прокурор Д.Баярмагнай энэ сарын 19-ний өдөр ШЕЗ болон Улсын Дээд шүүхийн Тамгын газарт зургаан шүүгчийг яллагдагчаар татахаас татгалзсан, түдгэлзүүлэх шаардлагагүй тухайгаа мэдээлэл хүргүүлэх тухай 1/1117 тоот бичгээр мэдэгджээ.Уг бичигт "...Халдашгүй эрх эдэлж байгаа зургаан шүүгчийг үндэслэлгүйгээр хөрөнгөжсөн гэмт хэргийн шинжтэй үйлдэл хийсэн гэж дүгнэх боломжгүй, хангалттай үндэслэл бүхий үйл баримт тогтоогдоогүй байх тул албан үүргийг одоогоор түдгэлзүүлэх шаардлагагүй гэж дүгнээд хүсэлтийг хүлээн авахаас татгалзаж шийдвэрлэсэн" гэж мэдэгдсэн байна. Ийнхүү үндэслэлгүйгээр хууль бусаар хөрөнгөжсөн байж магадгүй гэсэн нэр бүхий зургаан шүүгчийг яллагдагчаар татах боломжгүй болсон гэсэн үг юм