Өнгөрөгч ням гарагт буюу 9 дүгээр сарын 20-ны өдөр Баянзүрх дүүргийн 23 дугаар хорооны нутаг дэвсгэрт 9 настай Э охин хойд эцэг Б-н гарт амь насаа алдсан байж болзошгүй харамсалтай хэрэг гарлаа. Охиныг нас барах үед хойд эцэг нь согтуу байсан ба хэргийн газраас "Хараа" архины шил, олон тооны шар айрагны савыг баримт болгон авсан байна. ШШҮХ-ийн хариу албан ёсоор гараагүй байгаа ч урьдчилсан дүгнэлтээр охины нарийн гэдэс нь цоорсноос үүдэн, цус болон дотор эрхтэнд нь бохир орсон гэх мэдээлэл байгаа. Албаны эх сурвалжийн хэлж буйгаар охиныг задлан шинжилгээнд оруулахад гадна талд нүүр духны хэсэг хуучин зулгаруудтай. Дотор эрхтнийг шинжлэхэд баруун талынх нь хавирга 11-12, 4-5 хавирга хугарсан бороолсон байдалтай, Ингэхэд 4-5 хавирга хугарсан, бороолсон байдалтай. 12 хуруу гэдэс 0,5*0,6 хэмжээний няцарсан шархтай. Бүдүүн гэдэсний чацархай урагдсан. Тэр хэсэгт 1 литр бохирдлогдсон шингэнтэй байсан. Урьдчилсан байдлаар хэвлийн гялтангийн үрэвсэлийн хордлогын улмаас нас барсан. Таамаглаж байгаагаар тодорхой гадаргуутай зүйлээр хүчтэй цохисон байх магадлалтай” гэсэн урьдчилсан дүгнэлтийг танилцуулаад байгаа.
Талийгаач охин 9 настай Э нь айлын дунд охин бөгөөд ээж нь хойд эцэг болох Б-тэй 4 жилийн өмнөөс хамтран амьдарч нэг хүү төрүүлсэн байна. Охин Нийслэлийн Ерөнхий боловсролын 87 дугаар сургуулийн 4 дүгээр ангид энэ жил элсэн суралцаж байсан байна. Анх хоёрдугаар ангидаа Архангай аймгаас шилжин ирсэн бөгөөд өнгөрсөн жилийн хичээлийн жилд Архангай аймагт өвөө, эмээ дээрээ очин суралцаж байгаад энэ хичээлийн жилд тус сургуульд эргэн шилжин иржээ. Бид хоёрдугаар ангид даан авч байсан багшаас охины зан харилцааны талаар тодруулахад "Охин хичээлдээ маш сайн сурдаг, сэргэлэн, хөөрхөн охин байсан. Өвөө, эмээгийн хайртай охин байсан. Энэ жил манай сургуульд буцаж ирэхдээ өөр ангид элсэн орсон. Шилбээ татсан үсээ энэ жил тайрсан байсан харагдсан" гэж хэлсэн юм. Үргэлжлүүлэн бид хорооны Засаг даргаас тодруулахад хамтарсан баг гарч ажиллаж байгаа. Охины ээж "Манай гэр бүлд хүчирхийлэл болж байгаагүй. Архины хамаарал байхгүй" гэж мэдүүлсэн гэсэн тайлбарыг өгсөн юм.
Талийгаач 9 настай охин Э-ийн хөршүүд охины гэр бүлийг "Баянзүрх дүүргийн 23 дугаар хороо ...тоот хаяг дээр саяхан нүүж ирсэн. Албан ёсны хаяг дээрхи айл нь охины гэр бүлд хашаагаа түрээслүүлдэг" гэсэн мэдээллийг өгч байна. "Гэр бүлийн хүчирхийлэл үйлдэгддэг үгүйг мэдэхгүй. Хэд хэдэн удаа гэрийнх нь гадаа цагдаагийн автомашин ирсэн байхыг харж байсан" гэж хөрш нь хэлж байна.
Сэтгэгдэл (0)
Сэтгэгдэл бичигдээгүй байна