У.Хүрэлсүхийн Засгийн газар байгуулагдаад 100 хонох гэж байгаа энэ үед улсын хөгжлийг тэргүүлэх салбар болох уул уурхайн салбарын сайд Г.Ёндон хийсэн ажлаараа олонд танигдалгүй өдий хүрсэн ч төрийн өмчит үйлдвэрийн данснаас хоёр хүүхдийнхээ сургалтын төлбөрийг гаргуулсан баримтаараа олонд танигдаж чадлаа. Г.Ёндон нь 2019 оны дөрөвдүгээр сарын 19-ний өдөр “Монголросцветмет” ТӨҮГ-ын орлогч захирлаар томилогдож байсан бөгөөд сард дунджаар 17 сая төгрөгийн цалин авдаг байжээ. Гэтэл орлогч захирлын ажлаа аваад удаагүй байхдаа буюу 2019 оны 09 дүгээр сарын 04-ний өдөр “Монголросцветмет” ТӨҮГ-ын данснаас “Гёте” бүрэн дунд сургуулийн дансанд өөрийн хүүхдүүд Ё.Амира, Ё.Арвис нарын сургалтын төлбөр тус бүр 5,350,000 төгрөгийг нийт 10,700,000 төгрөгийг шилжүүлсэн байх юм.
Гэтэл тэрээр хөрөнгө орлогоо мэдүүлэхдээ 460 сая төгрөгийн үнэлгээ бүхий 2 байр, 3 граж, 17 сая төгрөгийн үнэ бүхий суудлын автомашин, 30 сая төгрөгийн үнэт эдлэл, дөрвөн тусгай зөвшөөрөл, 45 сая төгрөгийн үнэлгээтэй газар, 152 сая төгрөгийн хадгаламжтай гэж мэдүүлсэн байдаг.
Түүний хөрөнгө орлогоос харсан ч тэр сард дунджаар 10 гаруй сая төгрөгийн цалинтай байсан гээд бодохоор хоёр хүүхдийнхээ сургалтын төлбөрийг татвар төлөгчдийн халааснаас гаргуулах шаардлагагүй байсан гэж харагдаад байдаг. Магадгүй хүнд эд хөрөнгө, эрх мэдэл, албан тушаал байсан ч шуналд хязгаар байдаггүй бололтой.
Сэтгэгдэл (0)
Сэтгэгдэл бичигдээгүй байна