Дорноговь аймгийн Замын-Үүд суманд 2020 оны арваннэгдүгээр сарын 20-нд коронавирусын анхны тохиолдол бүртгэгдсэн. Энэ цагаас хойш БНХАУ-ын Эрээн хотоос Монгол жолооч нарыг хилээр нэвтрүүлэхгүй байх шийдвэр гарсан. Үүнтэй холбоотой Замын-Үүдийн боомт дээр 500-600 гаруй автомашин ачаа бөөгнөрчээ. Энэ асуудлаар бид Дорноговь аймгийн Замын-Үүд сумын Онцгой комиссын дарга Б.Анхбаяртай утсаар холбогдож тодрууллаа.
- Одоогийн байдлаар өдөрт хичнээн тээврийн хэрэгсэлтэй бараа тус боомтоор нэвтэрч байна вэ?
- Дорноговь аймгийн Зам-Үүд суманд коронавирусын анхны тохиолдол 2020 оны арваннэгдүгээр сарын 20-нд бүртгэгдсэн. Түүнээс хойш БНХАУ-аас Монголоос жолооч нэвтрүүлэхийг үндсэндээ хориглосон. Одоогийн байдлаар шахмал түлшний түүхий эд, нүүрс, түргэн муудах хүнсний бүтээгдэхүүн гээд өдөрт 18 машин л нэвтэрч байна.
- Шинжилгээний бичигтэй жолооч нарыг гаргаж ажиллуулах боломж байна уу, хэрхэн шийдэх вэ?
- Тус боомтоор энгийн үедээ өдөртөө 100-200 тээврийн хэрэгсэл нэвтэрдэг байсан юм. Одоогийн байдлаар 500-600 тээврийн хэрэгсэл ачаа Хятадын талд гацчихаад 20 гаруй хонож байна. Хоёр улсын Засгийн газар ярилцаад өдөрт 50 автомашин нэвтрүүлэхээр тохирсон ч жолооч байхгүй гэх шалтгаанаар өдөрт 18 автомашин нэвтэрч байна. Бид 38 жолоочоос шинжилгээ аваад тусгаарлачихсан, гаргахад бэлэн байгаа юм. Одоо хоёр улсын Засгийн газрын хэлэлцээрээр ямар шийдвэр гарахыг хүлээж байна.
- 18-20 автомашин бараа нэвтэрч байгаа гэж та сая хэллээ. Ямар шалгуураар түрүүлж нэвтрүүлж байна.
- Ерөнхийдөө нэн шаардлагатай барааг нэвтрүүлж байна. Тодруулбал шахмал түлшний түүхий эд, нүүрс, түргэн муудах хүнс. Иргэд болон аж ахуй нэгжийн бараа үндсэндээ гацаад 20 гаруй хонолоо.