2021/01/21
USD 2,811

Шүдний оо, ам зайлах шингэн коронавирусээс сэргийлэхэд тустай

О.Шүрэнцэцэг
2020/12/14

Британийн шүд судлалын холбооны “British Dental Journal” сэтгүүл дээр цайр эсвэл цагаан тугалга агуулсан шүдний оо нь корона вирусийн 99,9 хувийг 2 минутын дотор устгах чадвартайг харуулсан судалгааг нийтэлсэн байна. Судалгаанд өгүүлснээр оо, ам зайлагчийн найрлагад ордог эдгээр бодис нь хоёр минутын дотор корона вирусийг устгаж байжээ.

Түүнчлэн ам зайлагч шингэн, шүдний оо зэргийн найрлагад ордог цетилпиридиний хлорид нь корона вирусийг 30 секундын дотор устгаж байжээ.

ОХУ-ын суурь анагаах ухааны холбооны төвийн ажилтан, вирус судлаач А.Чепунов энэ судалгааны талаар rbc.ru сайтад тайлбарлахдаа шүдний оо, ам зайлагч шингэн нь амны хөндийд байгаа корона вирусийн 99,9 хувийг устгах чадвартай гэж нотолсон байна.

Гэхдээ энэ төрлийн судалгаанд 99,9 хувийг устгана гэж тодотгож байдгийг вирус судлаач, эрдэмтний байр сууринаас тайлбарласан байна. Тэрээр “Ахуйн хүрээнд 99,9 хувь гэсэн тоо хангалттай сүржин санагддаг ч микробиологийн хувьд өөр агуулгатай. Энгийн жишээ татъя: халдвар авсан оргил үед миний хамар- залгиураас арчдас авахад 1 миллилитр шингэнд 1 сая саятай адил тооны вирусийг агуулж байдаг. Хэрэв энэ тоог 99,9 хувиар багасгавал цаана нь 1 мянган саятай адил тооны вирус үлдэх нь халдвар авахад хангалттай юм” гэжээ.

Иймд шүдний оо, ам зайлагч зэргийг урьдчилан сэргийлэх зорилгоор ашиглаж болох ч үзүүлдэг нөлөө нь тун богино хугацаанд үйлчилдэг гэдгийг онцолжээ. Жишээлбэл, унтахын өмнө амны хөндийг цэвэрлэх замаар урьдчилан сэргийлэхэд тохиромжтой.