УИХ-ын чуулганы нэгдсэн хуралдаан эхэллээ. Хуралдаанаар Коронавируст халдвар /КОВИД-19/-ын цар тахлаас урьдчилан сэргийлэх, тэмцэх, нийгэм, эдийн засагт үзүүлэх сөрөг нөлөөллийг бууруулах тухай хуульд нэмэлт, өөрчлөлт оруулах тухай хуулийн төслийн хэлэлцэх эсэхийг шийдэж байна. Хуулийн төслийг Шадар сайд Я.Содбаатар танилцууллаа.
Гишүүд асуулт асууж, үг хэлэв.
УИХ-ын гишүүн Ж.Ганбаатар:Бодлогын хүү 11-ээс зургаа хүртэл буурч, 8 их наяд төгрөг цугласан. Үүнийгээ зөв зарцуулж чадахгүй байна шүү дээ. Зах зээл дээр мөнгө байхгүй байна. Хатуухан хэлэхэд өөрсдөө алдаа гаргачихаад онцгой байдал тогтооно, хаана гэж байгаа нь буруу.
УИХ-ын гишүүн Ц.Даваасүрэн: Улаанбаатарыг хаагаад дотор нь бизнесийг нь явуулаач ээ. Я.Содбаатар сайд аа, өөрөө жаахан ухаалаг бай. Юм л болвол хаана, хорино гэх юм. Бизнесийг хаана гэдэг нь шинээр бизнес эхлүүлсэн олон хүнийг нугачин дарж байна. Энэ хүмүүс чинь зөв аргаар мөнгө олдог хүмүүс шүү дээ.
Шадар сайд Я.Содбаатар: Би хаагаад байгаа зүйл биш шүү дээ. ДЭМБ болон эрдэмтэн судлаачид нь халдвар дэлгэрч, жилийн эцэс болоход шинээр халдвар авсан хүний тоо 400-450-д хүрч, цагаан сарын үед 2,800 хүн халдвартай болох нь гэж зөвлөсөн. Тиймээс дэлхийн улс орнуудын жишгээр л хөл хорионы арга хэмжээ авч байна.