2021/03/05
USD 2,811

Германд Оросын вакциныг ашиглахад бэлэн ч ганц л болзолтой

М.Төгөлдөр
2021/02/02

Сүүлийн үед Европын холбоо нь корона вирусийн эсрэг вакцины хомсдолтой тулгараад байгаа билээ. Үүнээс болоод Европын холбоо, Европ дах вакцины гол үйлдвэрлэгч ба Их Британийн дунд вакцина булаацалдан “гурвалжин дөрвөлжин юм” болж байгаа нь нууц биш. Өвчнийг тархалтыг зогсоох гэж хатуу хөл хорио тогтоосон өдөр болгон Европын холбоонд сая сая еврогоор тоологдох хохирол учруулж байгаа учраас аргагүй биз. Хэн ард иргэдээ хурдан вакцинжуулж чадна тэр нь хөл хориог хурдан тайлж, эдийн засгаа хурдан сэргээх боломжтой болох тул ийнхүү вакцины төлөө “тулалдаж” байгаа гэдгийг судлаачид онцолж байна. Ийм нөхцөлд Европын холбоо нь шүүмжлээд, үл тоогоод байсан Оросын “Спутник V” вакциныг тоож, олноор нь хэрэглэх боломжийн талаар яригдаад эхэлжээ.

Тухайлбал, Германы холбооны эрүүл мэндийн сайд Йенс Шпан нь ХБНГУ-д нь Оросын эсвэл Хятадын вакциныг ашиглахыг ер эсэргүүцэхгүй ч ганцхан болзолтой гэжээ. Тэр нь тухайн вакциныг хэрэглэхийг Европын холбооны холбогдох байгууллагууд зөвшөөрсөн байх ёстой юм байна.  Йенс Шпан энэ талаар ярихдаа “Вакцин нь аюулгүй, бодит үр нөлөөтэй бол цар тахалтай тэмцэхэд тусалж чадах нь мэдээж бөгөөд ямар улсад үйлдвэрлэгдсэн нь чухал биш юм” гэжээ.

ОХУ нь 2021 оны нэгдүгээр улиралд гэхэд л Европын холбоонд 100 сая тун “Спутник V” вакцин нийлүүлж чадна мэдэгдээд байгаа юм. Энэ бол 50 сая хүнийг бүрэн вакцинжуулахад хангалттай тоо юм. Оросууд вакцинаа бүртгүүлж, хүлээн зөвшөөрүүлэхээр Европын холбооны эмийн бэлдмэлийн агентлагт өргөдлөө хэдийн өгсөн, одоо хариуг нь хүлээж байгаа аж.