Зам тээврийн хөгжлийн сайд Л.Халтар тэргүүтэй албаныхан Улаанбаатар-Дарханы чиглэлийн 204км авто замын ажлын явцтай өнөөдөр /2021.04.16/ танилцлаа.
Азийн хөгжлийн банкны санхүүжилтээр хийгдэж буй 2 эгнээ авто замын өргөтгөл, шинэчлэлийн ажлыг 5 багцад хуваасан. Тавдугаар багц буюу Цайдамын хөндийгөөс Дарханы тойрог хүртэлх 30.7км авто замын ажлыг БНХАУ-ын Чайна Жео-Инженеринг компани гүйцэтгэж байгаа юм. Энэ оны ажлын гүйцэтгэл 70 хувьтай байна. Өнөөдрийн байдлаар цементээр бэхжүүлсэн суурийн ажил хийгдэж байна.
Салбарын сайд газар дээр нь ажиллах үеэрээ шинээр баригдаж буй авто замын суурийн бат бөхийн нягтыг шалгаж үзэхэд хуурай үеийн нягт нь 98 хувьтай байв. Энэ нь техникийн шаардлагад нийцсэн үзүүлэлт юм байна. Тухайн багц дээр өнгөрсөн жил 18 км замын хучилтыг хийсэн. Үлдсэн замын хучилтын суурийн ажлыг дуусган 7 дугаар сарын нэгэн гэхэд хоёр эгнээ замыг барьж ашиглалтад хүлээлгэн өгөх үүргийг салбарын сайд өгсөн юм.
Харин Европын сэргээн босголтын хөгжлийн банкны санхүүжилтээр хийгдэж байгаа 2 дахь ээлжийн 2 эгнээ замын ажил Дархан-Уул аймагт 3 дугаар сарын 15-ны өдрөөс эхэлсэн. Өнөөдрийн байдлаар ажлын гүйцэтгэл 10 хувьтай байна.
Замын ажлуудыг эрчимжүүлэх, хяналтыг сайжруулахыг Зам, тээврийн хөгжлийн сайд гүйцэтгэгч компани болон хяналтын ажлын хэсэгт үүрэг болгосон юм.
Авто замын ажилтай холбогдуулан орон нутгийн зүгээс чулуун кареруудыг гаргаж өгөх, замыг чөлөөлөх зэрэг гүйцэтгэгч компанийг ажлаа явуулахад шаардлагтай бүх боломж нөхцөлийг ханган өгсөн байна.
Сэтгэгдэл (0)
Сэтгэгдэл бичигдээгүй байна