ХӨСҮТ-ийн захирал Л.Баттөр өнөөдрийн ЗГ-аас гарсан шийдвэртэй холбоотой мэдээллийг олон нийтэд танилцуулж, сэтгүүлчдийн асуултад хариулт өглөө. Тэрбээр "Манай улсад коронавирусийн мутацид орсон шинэ төрөл Турк улсаас зөөвөрлөгдөн орж ирсэн гэсэн урьдчилсан мэдээлэл байна.
Манай улсын гурван вирусологич Япон улсад 20 гаруй сорьц дээр ажиллан, шинжилж байгаа. Ингэхэд мутацид орсон хувилбар илрээгүй байна. Гэхдээ бид цаг хугацаа хэмнэх PCR-т суурилан мутацид орсон хувилбарыг илрүүлэх шинжилгээг 33 сорьцонд хийж үзсэн. Турк улсаас ирсэн гурван иргэнд Их Британи хувилбар байна гэж гарсан. Эдгээр иргэд 10 хоногийн өмнө Турк улсаас ирж, ХӨСҮТ-д эмчлүүлж байна.
Харин хүн амын дунд хийсэн судалгаанаас хоёр хүнд мутацилагдсан хувилбар илэрсэн. Өнөөдрийн байдлаар өргөн хүрээнд тархсан гэх үндэслэлгүй. Мутацид орсон тохиолдолд тархалтын хурд их, хүндрэх магадлал өндөр ч хийх эмчилгээ ижил байгаа. Дэлхий нийтэд энэ хугацаанд вирус мутацид олон хэлбэрээр орж ирсэн. Манайд хийгдэж байгаа вакцинууд мутацид орсон хувилбарт үйлчлэхгүй гэсэн судалгаа байхгүй" хэмээн хэллээ.
Сэтгэгдэл (0)
Сэтгэгдэл бичигдээгүй байна