Хятад нь маргаантай бүс нутаг болох Зүүн Ладакийн ойролцоо жил болгон явуулдаг хээрийн сургуулиа эхлүүлсэн тухай Энэтхэгийн “The Times of India” сонин мэдээлж байна. Хээрийн сургууль нь маргаантай бүс нутгаас ердөө 100-250 км зайтай байрлах Кансивар, Кашгар нутагт болж байгаа аж. Энэтхэг нь эсрэг талын хээрийн сургуулийг анхааралтай ажиглаж, цэргээ оператив бэлэн байдалд байлгаж байгаагаа мэдэгджээ.
Энэтхэгийн талын мэдээгээр Хятадын ардын чөлөөлөх арми нь Зүүн Ладакт байрлаж байсан моторжуулсан явган цэргийн хоёр ротыг сэлгэж, бүс нутаг байлдааны байнгын дэд бүтэц байгуулах ажлын хүрээнд нисдэг тэрэг хөөрөх буух талбай засах, их бууны сумны агуулах барих, агаараас эсэргүүцэх системийн байрлал тохижуулах зэрэг ажлыг явуулж байгаа юм байна.
Энэтхэгчүүд ч ийм нөхцөлд зүгээр байсангүй Ладак болон бусад хэсэгт байрлалаа бэхжүүлж, өнгөрсөн жилийнх шиг цэрэг дайны ээдрээ үүсгэхгүй байхад шаардлагатай бүхнийг хийж байгаа гэж албан ёсоор мэдэгджээ. Гэхдээ Энэтхэг зарим армийнхаа зарим ангиудыг корона вирусийн тархалттай тэмцэх ажлын хүрээнд Ладакийн бүсээс татаж аваад байгаа юм байна.
Ийнхүү маргаантай бүс нутаг Ладакт түгшүүртэй байдал хадгалагдсан хэвээр байгаа ч Энтэтэг ба Хятадын цэргийн удирдлагууд хоорондоо тогтмол холбоо барьж байгаа аж. Энэтхэгийн талын мэдээгээр хятад нь маргаантай бүс нутгаас цэргээ ер холдуулаагүй бөгөөд их хэмжээний цэргийн хүчийг бүс нутагт бэлэн байлгасан хэвээр байгаа гэжээ.
Өнгөрсөн тавдугаар сарын эхээр Зүүн Ладакт Энэтхэг ба Хятадын армийн хооронд томоохон хэмжээний дайн үүсэж магадгүй аюултай нөхцөл байдал үүссэн юм. Пангог-Цонурын орчим хоёр талын тус бүр 250 цэргийн албан хаагч мод, чулуу барин гардан тулаан хийсний дараа ийм нөхцөл байдал үүссэн. Үүний дараа байдал намжилгүйгээр зургаадугаар сарын 15-аас 16-нд шилжих шөнө Галван голын орчим ахин гардан тулаан болж хоёр талаас олон цэргийн албан хаагч амь үрэгдсэн. Үүний дараагаар Хятад Энэтхэг хоёр нь Ладакийн орчим руу их буу, танк, байлдааны нисэх онгоц зэргийг татаж, маргаантай бүс нутагт ойролцоогоор 50 мянга орчим хүнтэй цэргийн бүлэглэл татан төвлөрүүлсэн. Гэхдээ хоёр тал дайтах гэж яаралгүй цэргийн болон дипломат шугамаар цуврал хэлэлцээ хийсний дараа, хоёрдугаар сарын 10-аас эхлэн маргаантай бүс нутагт төвлөрсөн цэргүүдээ эргүүлэн татаад байгаа юм. Гэвч эргүүлэн татахдаа цэргийн ангиудаа байнгын байрлал руу нь таталгүй, маргаантай бүс нутгаас 100-250 км зайнд л татаад байгаа тул түгшүүртэй байдал бүрэн арилаагүй байна.
Сэтгэгдэл (0)
Сэтгэгдэл бичигдээгүй байна