Сонгуулийн ерөнхий хороо Ерөнхийлөгчийн 2021 оны ээлжит сонгуульд Монгол Ардын нам, Ардчилсан нам, “Зөв хүн электорат” эвслээс нэр дэвшигчдэд өнөөдөр буюу 2021 оны 5 дугаар сарын 24-ний өдөр үнэмлэхийг нь гардууллаа.
Нэр дэвшигчдэд үнэмлэх гардуулах арга хэмжээний үеэр Сонгуулийн ерөнхий хорооны дарга П.Дэлгэрнаран нам, эвслийн төлөөлөл, нэр дэвшигчдэд хандаж хэлсэн үгэндээ, Монгол Улсын Үндсэн хууль, Монгол Улсын Ерөнхийлөгчийн сонгуулийн тухай хууль тогтоомжийг дээдлэн, сонгуулийн сурталчилгааг хуулийн дагуу шударга явуулах, ил тод, тэгш байдлыг хангах, иргэд сонгогчдын эрх ашигт болон бие биедээ хүндэтгэлтэй хандахын сацуу хууль бус аливаа үйлдэл, үйл ажиллагаанаас ангид ажиллахын чухлыг дурдаад Ерөнхийлөгчид нэр дэвшигчдэд амжилт хүслээ.
Монгол Улсын Ерөнхийлөгчийн 2021 оны ээлжит сонгуулийн сурталчилгаа нэр дэвшигчдэд үнэмлэх олгосноор өнөөдрөөс ийнхүү эхэлж байна
"Зөв ХҮН электорат" эвслээс Ерөнхийлөгчид нэр дэвшигч Д.Энхбат үнэмлэхээ гардаж аваад олон нийтэд дараах байр суурийг илэрхийлсэн юм.
Тэрбээр “Зөв ХҮН электорат” эвслээс миний биеийг Монгол Улсын Ерөнхийлөгчид нэр дэвшүүлсэн. Монголын ардчиллыг хөгжүүлэхийн төлөө, парламентын засаглалыг төгөлдөржүүлэхийн төлөө Монголынхоо ард түмний амьдралыг сайжруулахын төлөө, Монголын малчид чадна, Монголын инженерүүд, Монголын залуус чадна гэсэн уриатайгаар бид оролцож байна. Монголын 3 сая хүнийг улсынхаа хөгжилд идэвхтэй оролцуулах зарчмыг баримтална. Өөрөөр хэлбэл иргэддээ итгэж, хүн төвтэй хөгжлийн бодлогыг баримтална. Ерөнхийлөгчийн үүргийг Үндсэн хуульд тодорхой заасан байдаг. Монголын ард түмний болон төрийн нэгдмэл байдлыг хангах, улсаа гадаадад төлөөлөх зэрэг заасан байдаг. Энэ дагуу бид хөтөлбөрөө боловсруулсан. Ерөнхийлөгч бол нэг хүн биш, Ерөнхийлөгч бол институт, баг хамт олон.Тиймээс бид дэвшүүлсэн санал, санаачлагын дагуу Ерөнхийлөгчийн институтийг нам бус байлгаж, Монголын шилдэг мэргэжилтнүүдийг урьж ажиллуулна. Монголынхоо мэргэжилтнүүдэд итгэж бид ажиллана” гэлээ.
Сэтгэгдэл (0)
Сэтгэгдэл бичигдээгүй байна