Монгол Улсын Ерөнхийлөгчийн 2021 оны ээлжит сонгуулийн сурталчилгаа нэр дэвшигчдэд үнэмлэх олгосноор өнөөдрөөс эхэлж байна. Энэ жилийн Ерөнхийлөгчийн сонгууль Үндсэн хуулийн нэмэлт, өөрчлөлтийн дагуу явагдаж байгаа юм. Монгол Улсын Ерөнхийлөгчид нэр дэвших шалгуур, бүрэн эрхийн хугацааг Үндсэн хуулийн нэмэлт, өөрчлөлтөд “Ерөнхийлөгчөөр 50 нас хүрсэн, сүүлийн таваас доошгүй жил эх орондоо байнга оршин суусан, Монгол Улсын уугуул иргэнийг зургаан жилийн хугацаагаар зөвхөн нэг удаа сонгоно” гэж оруулсан. Энэ зохицуулалтын хүрээнд Ерөнхийлөгчийн сонгуулийн нэр дэвшүүлэлт явагдсан.
2021 оны Ерөнхийлөгчийн сонгуульд МАН-аас тус намын дарга У.Хүрэлсүх, АН-аас С.Эрдэнэ, "Зөв ХҮН электорат" эвслээс Д.Энхбат нар өрсөлдөж байна. Нэр дэвшигчид өнөөдрөөс эхлэн ирэх сарын 7-ны өдрийг дуустал сурталчилгаагаа хийнэ.
Ерөнхийлөгчийн сонгууль цар тахлын үед явагдаж байгаа учраас нэр дэвшигчид халдвар хамгааллыг сайтар сахиж сурталчилгаагаа явуулах журмыг Засгийн газраас баталсан.
Нэр дэвшигчдийн сонгуулийн ерөнхий менежерээр ажиллах хүнээс ихээхэн зүйл хамаардаг. Тэгвэл гурван нэр дэвшигчийн сонгуулийн ерөнхий менежерээр хэн, хэн ажиллах болохыг танилцуулж байна.
МАН-аас нэр дэвшигч У.Хүрэлсүхийн сонгуулийн ерөнхий менежерээр МАН-ын Ерөнхийн нарийн бичгийн дарга Д.Амарбаясгалан ажиллана. Харин АН-аас нэр дэвшигч С.Эрдэнийн сонгуулийн ерөнхий менежерээр нь Д.Эрдэнэсувд ажиллахаар болжээ. Д.Эрдэнэсувд нь эмч мэргэжилтэй бөгөөд АН-ын Гадаад харилцаа, сургалт хөгжлийн газрын даргаар ажилладаг. Мөн өнгөрсөн 2020 оны УИХ-ын сонгуульд Төв аймагт АН-аас нэр дэвшиж байсан.
Харин УИХ-ын гишүүн Т.Доржханд нэр дэвшигч Д.Энхбатын сонгуулийн ерөнхий менежерээр ажиллана.
Ерөнхийлөгчийн сонгуулийн тухай хуульд “Нэр дэвшигч өөрийн итгэмжлэл олгосон нэг ерөнхий менежер, аймаг, нийслэл, сум, дүүрэг тус бүрд нэг менежер, баг, хороо тус бүрд нэг шадар туслагч, 200 сонгогч тутамд нэг ухуулагчтай байж болно. Хэрэв тухайн аймаг, дүүргийн сонгогчийн тоог 200-д хуваасны үлдэгдэл нь 200-аас доош, 100-аас дээш бол тэдгээр сонгогчийг хариуцсан нэг ухуулагч ажиллаж болно” гэж заасан.
Сэтгэгдэл (0)
Сэтгэгдэл бичигдээгүй байна