Засгийн газрын ээлжит өнөөдрийн хуралдаанаас гарсан зарим шийдвэрийн талаар Ерөнхий сайдын хэвлэлийн төлөөлөгч Ч.Болортуяа мэдээлэл хийлээ.
1. Эрүүл мэндийн эрт илрүүлгийн шинжилгээнд хамруулдаг байх үндэсний хөтөлбөртэй болох чиглэлийг Эрүүл мэндийн сайд болон холбогдох сайд нарт чиглэл өгсөн байна. Эрүүл мэндийн үзлэгийг мэдээллийн цахим хэлбэрт шилжүүлээд иргэдийн эрүүл мэндийн дата цахим санг бий болгох юм.
2. Хөгжлийн бэрхшээлтэй иргэдийн тулгамдсан асуудлыг цогцоор нь Засгийн газрын хуралдаанд оруулах чиглэлийг өнгөрсөн долоо хоногт өгсөн. Үүнтэй холбоотойгоор хөгжлийн бэрхшээлтэй иргэдэд тулгамдаж байгаа асуудлыг шийдэх багц бодлого боловсруулах чиглэлийг холбогдох сайд нарт өглөө.
3. Нийслэл хотод тулгамдсан асуудлыг цогцоор нь шийднэ. Ялангуяа түгжрэл, иргэдийг орон сууцаар хангах асуудлыг цогцоор нь авч үзсэн. Ерөнхий сайд, хотын дарга нар нийслэлийн зургаан дүүрэгт ажилласан. Зургаан дүүрэгт ажилласан Засгийн газрын хуралдааны тэмдэглэлийг өнөөдөр танилцуулсан. Үүний хүрээнд тодорхой чиглэлийг Ерөнхий сайд өгсөн. Түгжрэлийг бууруулах хүрээнд зарим уулзварт нүхэн гарц хийх санхүүжилтийг 2022 оны улсын төсөвт суулгана. Сэлбэ голын дагуух тохижилт, урсцыг нэмэгдүүлэх ажил, Бэлх, Сэлэхийн үерийн хамгаалалтын далан байгуулах төсвийг 2022 оны улсын төсөвт суулгах чиглэл өглөө.
4. Шаардлагатай гэж үзвэл ажлын байр дэмжих зээлийн эх үүсвэрийг нэг их наядаар нэмэгдүүлж гурван их наяд болгоно.
Эрүүл мэндээ хамгааж, эдийн засгаа сэргээх 10 их наяд хөтөлбөрийн 2.1 их наяд төгрөгийг ажлын байр дэмжих чиглэлд гурван хувийн хүүтэй зээл олгож буй. Үүний 1.1 их наяд төгрөгийн зээлийг иргэн, ААН нэгж, байгууллагад олгож 63 мянган ажлын байрыг хамгаалжээ.
Сэтгэгдэл (0)
Сэтгэгдэл бичигдээгүй байна