НБА-н 2020-2021 оны улирлын плэй-оффын хоёрдугаар шатны тоглолтууд үргэлжилж байна. Өнөөдөр НБА-н талбайд хоёр тоглолт болсноос Финикс Санс баг 125-118 харьцаагаар Денвер Наггетс багийг хожиж цувралыг 4-0-ээр өндөрлүүлж бүсийн аваргын төлөө шалгарч үлдлээ.
Цувралын дөрөвдэх тоглолтонд К.Пол 37 оноо, 7 оновчтой дамжуулалт, 3 удаа самбараас бөмбөг авч шилдэг тоглолтоо үзүүлсэн. Түүнээс гадна багийн залуу лидер Д.Бүкер 34 оноо, М.Брижес 14, Д.Айтон 12 оноо авсан байна. Харин тэдний өрсөлдөгч Денвер Наггетс багаас таван тоглогч 10-аас дээш оноо авсан ч цувралд хожил авч чадсангүй. Сүүлийн тоглолтод улирлын үнэ цэнэтэй тоглогч Н.Йокич талбайгаас хөөгдөж байдлыг бүр хүндрүүлсэн.
Финикс Санс баг хамгийн сүүлд С.Нэш, А.Стадемайр, Г.Хилл нарын үед буюу 2009-2010 оны улиралд плэй-оффт шалгарч байсан. Түүнээс хойш 11 жилийн дараа залуу лидер Д.Бүкер, НБА-н туршлагатай холбон тоглогч К.Пол тэргүүтэй Финикс Санс баг плэй-оффт шалгарч аяллаа амжилттай үргэлжлүүлж байна. Финиксийн дараагийн өрсөлдөгч нь бүсийн аваргын төлөө Юта Жазз болон Лос-Анжелес Клиперс багуудын аль хожсон нь байна.
23°C
Сэтгэгдэл (0)
Сэтгэгдэл бичигдээгүй байна