УИХ дахь МАН-ын бүлэг өнөөдөр /2021.06.14/ хуралдаж, хоёр асуудал хэлэлцсэн байна. Хуралдаанаар хэлэлцсэн асуудлын талаар бүлгийн дарга Д.Тогтохсүрэн болон УИХ-ын гишүүн Ц.Мөнх-Оргил нар мэдээлэл хийлээ.
УИХ дахь МАН-ын бүлгийн дарга Д.Тогтохсүрэн: Хуралдаанаар Ерөнхий сайд Л.Оюун-Эрдэнийн мэдээллийг сонссон. Гурван чиглэлээр мэдээлэл авсан. Нэгт, ковидын нөхцөл байдал, болон цаашид авч хэрэгжүүлэх арга хэмжээ хоёрт, төсвийн тодотгол, улсын баяр наадам, цаг үеийн нөхцөл байдал, гуравт, хөрөнгө оруулалт, төсвийн чиглэлийн арга хэмжээг авч хэрэгжүүлэх талаар мэдээлэл сонссон. Засгийн газар ойрын үед ковидын асуудлаар тодорхой шийдвэр гаргана. Баяр наадмаас өмнө энэ оны төсөвт тодотгол хийнэ. Төсвийн тодотгол хийх зайлшгүй шаардлага үүссэн. Хүүхдийн мөнгөнөөс эхлээд. Тиймээс Засгийн газар төсвийн тодотгол хийх чиглэлээр ажиллаж байна. Удахгүй УИХ-д өргөн барина.
Мөн өнөөдрийн хуралдаанаар Хөдөлмөрийн тухай хуулийг хэлэлцсэн. Ажлын хэсгийн ахлагчаар Ц.Мөнх-Оргил гишүүн ажиллаж байгаа. Хуулийг энэ хаврын чуулганаар батлах дээр бүлэг санал нэгджээ.
-Наадам хийхийг иргэд эсэргүүцэж байна. Энэ асуудалд бүлэг байр сууриа нэгтгэсэн үү?
-Баяр наадамтай холбоотой асуудлаар Ерөнхий сайдтай ярилцлаа. Өнөөдөр шийдвэр гаргах хараахан болоогүй байна. Нөхцөл байдлаа харъя гэсэн.Энэ жил Ардын хувьсгалын 100 жилээс гадна олон аймаг, сумын ой тохионо. Тиймээс Засгийн газар нөхцөл байдлыг судалж байгаад зургадугаар сарын сүүлээр ярилцахаар тогтож байгаа. Өнөөдөр наадмыг хийнэ, хийхгүй гэсэн шийдэл өнөөдөр гараагүй. Судалж, үзэж байж шийдвэр гаргана.
Сэтгэгдэл (0)
Сэтгэгдэл бичигдээгүй байна