2021/08/06
USD 2,811

Хотын ойдоо барьсан бэлэг

Н.Сумъяасүрэн
2021/06/14

Найрамдлын хотын бүтээн байгуулалтад гар бие оролцсон Монгол Улсын Соёлын Гавьяат зүтгэлтэн Ө.Рагчаасүрэн Дархан хот байгуулагдсаны 60 жилийн ойдоо номын бэлэг барилаа.

Сэтгүүлч Ө.Рагчаасүрэн нь Өмнөговийн арван жилийн дунд сургууль дүүргээд ангийн нөхөдтэйгөө хамт 1968 онд илгээлт өвөртлөн Дарханд ирж үйлдвэрт ажиллан эндээ суурьшсан юм. Тэрбээр хотынхоо нэгэн жарны ойд зориулан бүтээсэн нарсан ойн амьтдын адал явдалт “Уутан хацарт” нэртэй туужийн номын дээжийг Дархан-Уул аймгийн Засаг дарга Б.Азжаргалд гардууллаа.

Монгол орны ойн тавхан хувийг эзэлдэг нарсан ойг хамгаалах сэдэвтэй энэ ном нь хүүхэд том хүмүүс бүх насныханд зориулагджээ. Ойн амьтдад тохиолдож байгаа хөгжөөн наргиантай үйл явдал, байгаль амьтан, ой мод ургамлын харилцааны зөн билгийн утга агуулга уг номонд дүрслэгдсэн байна. Нарсан ойд олон амьтан амьдардаг. Тэд ой мод цэцэг ургамалтайгаа ярьж ойлголцож, тэднийгээ хүнээс илүү хамгаалж нөхөн сэргээдэг чадвартай. Ой мод амьтан жигүүртнүүд нь хоорондоо харилцдаг өөрийн хэлтэй. Газар ус нь тэднийг сонсдог. Энэ бүхнийг хүмүүс мэддэггүй. Тэгвэл туужийн ном уншигчиддаа тэрхүү ойлголтыг өгнө.

Байгаль хамгаалах тэр дотроос нарсан ойг хамгаалах үзэл санааг шингээсэн энэ номыг бүтээхэд аймгийн Засаг дарга Б.Азжаргал сэтгэл тавин хамтарч ажилласанд зохиогч талархал илэрхийллээ. Аймгийнхаа бүх сургуулиуд болон байгаль хамгаалагчид, ойн нөхөрлөлийн гишүүдэд зохиогч номоо бэлэг болгон гардуулав. Хүн болон байгальд маш их ач тустай нарсан ойгоо хайрлан дээдлэхийг “Уутан хацарт” туужийн ном уншигчиддаа уриалж байна.


Сэтгэгдэл (0)

ХХЗХ-ны журмын дагуу зүй зохисгүй зарим үг, хэллэгийг хязгаарласан тул ТА сэтгэгдэл бичихдээ хууль зүйн болон ёс суртахууны хэм хэмжээг хүндэтгэнэ үү. Хэм хэмжээг зөрчсөн сэтгэгдэлийг админ устгах эрхтэй.

Сэтгэгдэл бичигдээгүй байна