Оны эхнээс V/31 хүртэлх хугацаанд Монгол Улс 8.7 сая тонн нүүрс экспортлоод байна

Оны эхнээс тавдугаар сарын 31-ний өдөр хүртэлх хугацаанд Монгол Улс 8.7 сая тонн нүүрс экспортлоод байна.

Нүүрсний экспортын талаас илүү хувийг гаргаж буй Гашуунсухайт боомтоор  өдөрт хамгийн ихдээ 300 автомашин, хамгийн багадаа 200 автомашинаар нүүрс экспортолж гаргаж байгаа гэж Сангийн сайд Б.Жавхлан мэдээлсэн. Гэвч бодит газар дээрээ цөөхөн хэдэн машин гарч байгааг жолооч нар хэлж буй.

Манай улс энэ жил 42 сая тонн нүүрс экспортод гаргахаар төсөвлөсөн.Гэвч цар тахалтай холбоотойгоор манай улсын нүүрсний экспортод тасалдал үүсч, дээрх зорилтдоо хүрэхгүй нөхцөл байдалд хүрээд байна.  Хүлээгдэж буй  төсөөллөөр он дуустал нийтдээ 28 сая тонн орчмыг гаргах болов уу гэсэн тооцооллыг Сангийн яам хийжээ. 

Батлан хамгаалах сайд Г.Сайханбаяраас ахлуулсан байнгын ажиллагаатай Ажлын хэсгийг Өмнөговь, Дорноговь аймагт зургадугаар сарын 30-ны өдрийг хүртэл ажлуулахаар болсон талаар УОК-ын Ерөнхий нарийн бичгийн дарга Т.Баярхүү мэдээлсэн. Ажлын хэсэг экспортын гол үйл ажиллагаанд зохицуулалт хийж, халдвар хамгаалалтын дэглэмийг сахиулж ажиллах үүргийг өгсөн.