Ерөнхийлөгч У.Хүрэлсүх өчигдөр /2021.07.16/ БНХАУ-ын дарга Ши Жиньпинтэй утсаар ярьж, хилийн боомтын нэвтрүүлэлтийг хэвийн болгох, байгалийн хийн хоолойн төслийг урагшлуулахад дэмжлэг үзүүлэх, цөлжилтийн эсрэг хамтран ажиллах зэрэг тодорхой асуудлуудаар тохиролцоонд хүрсэн.
Тэгвэл БНХАУ-ын төв телевиз CCTV, англи хэлээр мэдээ, мэдээлэл бэлтгэдэг CGTN суваг, төрийн мэдээллийн агентлаг Xinhua зэрэг хэвлэл, мэдээллийн хэрэгслээр Монгол, БНХАУ-ын төрийн тэргүүн нар утсаар ярьсан талаар онцлон мэдээлсэн байна.
Тухайлбал, CGTN сувгийн вэбсайтад гарсан мэдээнд: “БНХАУ, Монгол Улс нь тусгаар тогтнол, бүрэн эрхт байдал, газар нутгийн бүрэн бүтэн байдал, язгуур ашиг сонирхлыг харилцан хүндэтгэхийн хажуугаар Иж бүрэн стратегийн түншлэлээ баяжуулан хөгжүүлэх” талаар БНХАУ-ын дарга Ши Жиньпин онцолсон гэжээ.
Улмаар БНХАУ-ын дарга Ши Жиньпин хэлэхдээ, “Бүс ба Зам” санаачилгын хүрээнд хоёр улсын хамтын ажиллагааг бэхжүүлж, уул уурхай, дэд бүтэц, байгаль орчны чиглэлээрх хамтын ажиллагаагаа улам гүнзгийрүүлэх хэрэгтэй бөгөөд БНХАУ нь Монгол Улсаас уул уурхай болон хөдөө аж ахуйн гаралтай бүтээгдэхүүний импортыг нэмэгдүүлэхэд бэлэн байгааг тэмдэглэсэн байна.
Харин БНХАУ-ын төрийн мэдээллийн Xinhua агентлагийн мэдээлснээр, БНХАУ-ын дарга Ши Жиньпин хоёр улсын Иж бүрэн стратегийн түншлэлийг улам баяжуулан хөгжүүлэх хэрэгтэй хэмээн тэмдэглэсэн гэжээ.
Түүнчлэн БНХАУ нь Монгол Улсын цар тахалтай тэмцэх чиглэлээр явуулж буй арга хэмжээнд үргэлжлүүлэн дэмжлэг үзүүлэхэд бэлэн гэдгийг хэлсэн байна.
28°C
Сэтгэгдэл (17)