Хүн амын дунд коронавирусийн дельта хувилбар бүртгэгдсэн талаар өнөөдөр Засгийн газрын ээлжит бус хуралдаанд танилцуулжээ. Өнгөрөгч тавдугаар сарын эхээр дельта вирусийн зөөвөрлөгдсөн тохиолдол илэрч, тусгаарлан эмчилсэн. Эрүүл мэндийн яам, ХӨСҮТ, Оном сангийн хамтарсан судалгааний хүрээнд Колумбын их сургуульд илгээсэн шинжилгээнээс 13 хүний сорьцоос дельта вирусийн хоёр тохиолдол, Интермэд эмнэлэгт долдугаар сарын эхээр хийсэн шинжилгээнүүдээс дельта вирусийн нэг тохиолдол илэрсэн байна. Сорьцууд баталгаажиж бүрэн дуусаагүй байгааг Эрүүл мэндийн сайд С.Энхболд хэлээд иргэд халдвар хамгааллын дэглэмээ сайтар баримтлахыг зөвлөлөө.
Одоогоор гурван тохиолдол бүртгэгдсэн байна.Үргэлжлүүлэн мөн сорьцуудад шинжилгээ хийж байгаа аж. Энэ талаар Эрүүл мэндийн сайд С.Энхболд хэлэхдээ "Халдварын тархалт сүүлийн нэг сард харьцангуй тогтвортой байлаа. Сүүлийн 14 хоногт 1500 орчим тохиолдол бүртгэгдэж байна. Бид сорьц шинжилгээг хийж байна. Энэ сарын эхээр хийсэн шинжилгээний сорьцын дүн гарлаа. 14 сорьцод 1 нэг тохиолдол дельта вирус болохыг бүртгэлээ. Зургадугаар сараас өмнө хийсэн 1500 сорьцод таван зөөвөрлөгдсөн тохиолдлоос дельта вирус илэрсэн. Өнөөдрийн байдлаар нийт гурван тохиолдлоос дельта вирус илэрч, зарим шинжилгээний сорьц бүрэн баталгаажаагүй байна. Бид Япон руу 200, АНУ руу мөн сорьц илгээсэн. Энэ долоо хоногт эдгээр сорьц баталгаажина.
Дельта вирус өнөөдрийн байдлаар дэлхийн 114 оронд тархаж эрчимтэй тархаж байна. Иймд иргэд та бүхэн халдвар хамгааллын дэглэмээ сайн сахиж, вакцинжуулалтдаа хамрагдаарай. Дельта вирус нь илүү хурдан тархдаг мөн өвчтөний биеийн байдлыг илүү хурдан хүндрүүлдэг онцлогтой" гэлээ.
28°C
Сэтгэгдэл (26)