Америкийн Нэгдсэн Улсад төвтэй “Говь сан” 2021 оны 6 дугаар сарын сүүлчээр Монгол Улсынхаа 21 аймаг, Улаанбаатар хотын 9 дүүрэгт ХҮЧИЛТӨРӨГЧИЙН ӨТГӨРҮҮЛЭГЧ АППАРАТ илгээх хандивын аянг гадаадад байгаа Монголчуудынхаа дунд өрнүүлсэн байна. Харь оронд амьдарч ажиллаж буй олон арван хүмүүс хандивын аянд нэгдснээр шаардлагатай хөрөнгийг босгож олон улсын чанарын шаардлага хангасан 60 ширхэг JAY-5BW загварын хүчилтөрөгчийн өтгөрүүлэгч аппаратыг эх орондоо илгээжээ.
Үүнээс Дархан-Уул аймагт хуваарилагдан ирсэн 4 ширхэг хүчилтөрөгчийн өтгөрүүлэгч аппарат болон хүчилтөрөгч, пульс хэмжигч багаж зэрэг тоног төхөөрөмжийг Нэгдсэн эмнэлэгт хүлээлгэн өглөө. Тус аппарат нь үйлдвэрийн нэг жилийн баталгаатай бөгөөд техникийн засвар үйлчилгээ, ажиллуулах зааварчилгаа зэргийг эмнэлгийн тоног төхөөрөмж нийлүүлэгч “Ашид буян” ХХК хариуцан ажиллах юм байна.
Мөн ЭМЯ-наас Ковид-19-ийн эмчилгээнд хэрэглэх арбидол эм, хүндэрсэн хүмүүст хэрэглэх вирусийн эсрэг тариа, түргэвчилсэн оношлуур зэрэг 60 орчим сая төгрөгийн шаардлагатай эм, эмнэлгийн хэрэгслүүдийг нийлүүлсэн байна. Үүнийг ӨЭМТөвүүд болон Шарын гол, Орхон, Хонгор сумын ЭМТөвүүдэд хуваарилан өглөө.
Тус аймгийн Нэгдсэн эмнэлэгт Ковидын тусламж эмчилгээ үйлчилгээ хэвийн явагдаж байгаа бөгөөд хүчилтөрөгчийн өтгөрүүлэгч аппарат 50 ширхэг, зохиомол амьсгалын аппарат 14 ширхэг байна.
Сэтгэгдэл (0)
Сэтгэгдэл бичигдээгүй байна