Токио-2020 зуны олимпын XXXII наадамд одоогоор 51 орон медаль хүртээд байгаа билээ. Тэгвэл эдгээр улс дундаас тусгаар тогтноогүй Косово, Тайвань, Бермуд арлаас тус бүр медалийн эзэд тодроод байна.
Ялангуяа Америк тивийн зүүн талд Атлантын далайд орших Их Британи улсын далайн чанад дахь эзэмшил нутаг болох Бермуд арлаас триатлоны төрөлд Флора Даффи хэмээх бүсгүй алтан медаль хүртэж тус арлын түүхэн дэх олимпын анхны алтан медалийг хүртээд байна.
Флора Даффи триатлоны ДАШТ-нд хошой алт, хошой мөнгөн медаль хүртэж байсан шилдэг тамирчин бөгөөд олимпын наадамд нийт замаа 1 цаг 55 мин 36 сек-д туулсан амжилтаар аваргын алтан медалийг хүртжээ. Тэрээр усанд сэлэлтийн замаа 18 мин 22 секундэд, дугуйн замаа 1 цаг 02 мин 49 секундэд туулсан бол гүйлтийн замаа 33 минутанд туулан барианд орсон байна.
Бермуд арал нь 1936 оны Берлиний олимпын наадмаас эхлэн оролцохдоо 1976 оны Монреалын олимпын наадмаас боксын төрөлд хүрэл медаль хүртэж байсан. Тэгвэл 45 жилийн дараа Бермуд арлын олимпын 2 дахь, анхны алтан медалийг авчирч байна.
Бермуд арал нь 53 км.кв нутаг дэвсгэртэй бөгөөд манай Сүхбаатар аймгийн Баруун-Урт хотын газар нутагтай ойролцоо бөгөөд хүн ам нь 2018 оны байдлаар 71 мянга буюу Дорноговь, Өмнөговь аймгуудын хүн амтай ойролцоо ажээ.
18°C
Сэтгэгдэл (1)