Монгол Улсын нийт хүн амын 60% коронавирусийн эсрэг вакцины бүрэн тунд хамрагдаад байна. Хүүхдүүдийг бүрэн вакцинжуулснаар хүн амын 70 орчим хувьд хүрэх тооцоолол бий.
Засгийн газрын хуралдаанаас гаргасан шийдвэрийн талаар Ерөнхий сайдын хэвлэлийн төлөөлөгч Ч.Болортуяа мэдээлэл өглөө. Тэрбээр “Өнөөдрийн байдлаар нийт хүн амын 60 хувийг вакцинд хамруулаад байна.Хэдийгээр Монгол Улс хүн амынхаа 60 хувийг вакцинд хамруулсан ч тайвшрах цаг болоогүйг ЭМЯ-аас мэдээлж байна.Засгийн газрын ээлжит хуралдаанаар эрүүл мэндээ хамгаалж, эдийн засгаа сэргээх 10 их наядын цогц төлөвлөгөөний хэрэгжилтийг долоо хоног бүр танилцуулдаг. Уг танилцуулгад зээлийн нийт гүйцэтгэл 3.2 их наяд, буюу 32 хувьтай байна. Цогц төлөвлөгөөг хэрэгжүүлснээр 210 мянган ажлын байрыг хадгалж чадсан тухай Сангийн яамнаас мэдээлсэн.
Замын-Үүдийн чөлөөт бүсийг нээж байнгын ажиллагаанд оруулах тухай Засгийн газрын тогтоол баталсан. Чөлөөт бүсээс гадна Замын-Үүд дэх боомтын үйл ажиллагааг жигдрүүлэх зорилгоор ажлын хэсэг байгуулан ажиллаж байна. Гадаад харилцааны сайд Б.Батцэцэг БНХАУ-д албан ёсны айлчлал хийж буй. Энэ хүрээнд хил гаалийн ачаа тээврийн нэвтрэлтийг сайжруулах, нүүрсний гарцыг нэмэгдүүлэх гэх мэт Монголын талаас тавьсан бүх саналуудад БНХАУ-ын тал нааштай хариу өгсөн.
Замын-Үүдийн хилийн боомтын гарах чиглэлд 110 машин гарч буй бөгөөд үүнээс 100 авто машин ачаагүй, нүүрстэй 10 машин гарч байна. Орох чиглэлд ачаатай 100, импортын 50-60 автомашиныг өдөр бүр нэвтрүүлж байна" гэлээ.
Мэдээллийн дараа сэтгүүлчдийн асуултад хариулт өгсөн юм.
-Монгол Улс иргэддээ вакцины бүүстер тунг хэзээнээс хийх вэ?
-ДЭМБ-аас хараахан гурав дах тунг зөвлөөгүй байна. Учир нь дэлхий дахинд цар тахлын эсрэг вакцинжуулалт хүртээмжгүй байгаа. Дэлхийн зарим улс оронд “Бүүстэр” буюу гурав дах тун байтугай эхний тунг хийж амжаагүй байхад гурав дах тунг хийнэ гэж ярих нь зохимжгүй гэж үзсэн талаар ДЭМБ-аас зөвлөсөн. ЭМЯ-наас өгсөн өнөөдрийн мэдээллээр наймдугаар сард багтаж зорилтот бүлэгт хандсан гурав тунгийн вакцинжуулалтыг эхлүүлнэ гэсэн төлөвлөгөөг танилцуулсан. Гэхдээ Засгийн газар, УОК-оос шийдвэр гараагүй.
18°C
Сэтгэгдэл (3)