МАН нөхөн сонгуульд нэр дэвшигчдийг ирэх сарын 1-нээс өмнө тодруулна

МАН-ын Бага хурал өнөөдөр цахимаар хуралдсан. Уг хуралдаанаар хоёр асуудлыг хэлэлцжээ. Тодруулбал, нөхөн сонгуулиудад оролцох эсэхээ намууд энэ сарын 11-нээс өмнө илэрхийлэх ёстой. Энэ дагуу МАН нөхөн сонгуульд оролцохоор шийдвэрлэжээ.

Энэ талаар МАН-ын Бага хурлын гишүүн Б.Пүрэвдагва "Өнөөдөр МАН-ын Бага хурлын 12 дугаар хуралдаан болж дууслаа. Хурал хоёр асуудал хэлэлцсэн. Тодруулбал, нөхөн сонгууль болон нөхөн сонгуульд нэр дэвших хүнийг тодруулж, санал хураах журмыг баталсан.

Тухайн хоёр тойрогт нэр дэвших эрхмүүдийг сонгохдоо социологийн судалгаан дээр үндэслэх, анхан шатны намын байгууллагын саналыг харгалзан үзэх, намын гишүүдийн саналыг харгалзан үзэх гэсэн олон заалттай. Нэр дэвшигчдийг тодруулах хуулийн хугацаа ирэх сарын 1. Намын бага хурал тухайн үед дахин хуралдаж, дээрх шаардлагуудыг хангасан хүмүүсийг нэр дэвшүүлнэ” гэлээ.