Өршөөлийн хуульд 4938 хүн хамрагджээ

Шүүхийн ерөнхий зөвлөлөөс "Өршөөл үзүүлэх тухай хууль"-ийн хэрэгжилтийн талаар мэдээлэл хийлээ.

ШҮҮХИЙН ХАМТЫН АЖИЛЛАГАА, ОЛОН НИЙТТЭЙ ХАРИЛЦАХ ХЭЛТСИЙН ДАРГА Б.БИНДЭРЪЯА:

Өршөөл үзүүлэх тухай хууль 2021 оны долдугаар сарын 2-ны өдөр  УИХ-аар батлагдаж, долдугаар сарын 6-ны өдрөөс эхлэн хүчин төгөлдөр мөрдөгдөж эхэлсэн. Уг хуулийн хэрэгжилтийг наймдугаар сарын 25-ны байдлаар хүргэе. Нийт гурван төрлийн эрүүгийн хэргээр ял эдэлж байсан хүмүүс энэ хуульд хамрагдсан.

• 2017 оны зургадугаар сарын 30-ний өдрийн 24 цаг 00 минутаас өмнө 2002 оны нэгдүгээр сарын 3-ны өдөр баталсан Эрүүгийн хуульд заасан гэмт хэрэг үйлдсэн,
• 2021 оны зургадугаар сарын 24-ний өдрийн 24 цаг 00 минутаас өмнө 2015 оны арванхоёрдугаар сарын 3-ны өдөр баталсан Эрүүгийн хуульд заасан гэмт хэрэг үйлдсэн,
• 2021 оны зургадугаар сарын 24-ний өдрийн 24 цаг 00 минутаас өмнө Зөрчлийн тухай хуульд заасан зөрчил үйлдсэн,

Өршөөлийн хуульд залилан үйлдсэн мөн  мансуурах, сэтгэгцэд нөлөөлөх эм, бэлдмэл бодисыг хууль бусаар бэлтгэх, олж авах, хадгалах, тээвэрлэх, илгээх, борлуулах гэсэн гэмт хэрэг үйлдсэн хүмүүс мөн албан тушаалын гэмт хэрэг Өршөөлийн хуульд хамрагдахгүй. 

Хохирсон иргэд нөхөн төлбөрөө нэхэмжлэх бүрэн боломжтой. Шүүхээс Өршөөл үзүүлэх тухай хуулийн дөрөвдүгээр зүйлийн 4.1 дэх хэсэгт зааснаар нийт 1897 ялтныг өршөөн хэтрүүлж, тавдугаар зүйлийн 5.1-5.3 дугаар зүйлд зааснаар 499 хүнд холбогдох 425 хэргийг өршөөн хэрэгсэхгүй болгож, зургадугаар зүйлийн 6.1-6.3 дахь хэсэгт зааснаар 602 ялтны эдлээгүй үлдсэн хорих ялаас хоёр жилийг хассанаас 166 ялтан суллагдаж, долдугаар зүйлийн 7.1-7.3 дахь хэсэгт зааснаар 1061 ялтанд оногдуулсан хорих ялыг дүйцүүлэн хасч, наймдугаар зүйлийн 8.1 дэх хэсэгт зааснаар 879 хүнд холбогдох 873 хэргийг өршөөн шийтгэлээс чөлөөлж, хэргийг хэрэгсэхгүй болгож шийдвэрлэсэн байна. Дээрх үзүүлэлтээс харахад, Өршөөл үзүүлэх тухай хуульд давхардсан тоогоор 4938 хүн хамрагдсан. 

• Хорих ялаас өршөөн хэлтрүүлснээр суллагдсан иргэд нийт 253, 
• Торгох ялаас-1134
• Зорчих эрхийг нь хязгаарлах ялаас-15
• Нийтэд тустай ажил хийлгэх-302