Эрүүл мэндийн яам коронавирусийн халдварын тоог дарж мэдээлдэг байж болзошгүй талаар бид өмнө нь мэдээлсэн. Тодруулбал, 2021 оны есдүгээр сарын 8-ны өдөр буюу өчигдөр улсын хэмжээнд нийт 3677 хүнээс халдвар илэрсэн талаар ЭМЯ-наас мэдээлсэн.
Гэвч ДЭМБ-ын Covid-19-ийн олон улсын статистик дээр Монгол Улсад 4163 тохиолдол бүртгэгдсэн гэж мэдээлсэн байна.
Яагаад зөрүүтэй мэдээлсэн талаар ЭМЯ-ны Эмнэлгийн тусламжийн бодлого, хэрэгжилтийг зохицуулах газрын дарга Б.Буянтогтохоос тодрууллаа. Тэрбээр " ЭМЯ зөвхөн PCR шинжилгээгээр батлагдсан тоог зарлах ёстой. PCR шинжилгээ болон түргэвчилгээний шинжилгээний тоонууд холилдоод хоёр янзаар мэдээлэгдсэн байхыг үгүйсгэхгүй. Яам зөвхөн PCR шинжилгээгээр батлагдсан тоонуудыг зарладаг. Энэ бол Монгол Улсад бүртгэгдсэн халдварын албан ёсны тоо. Түргэвчилсэн шинжилгээ 20 хувьд нь алдах магадлалтай. Энэ үүднээс түргэвчилсэн бус PCR шинжилгээгээр батлагдсан тоог мэдээлэх ёстой. Энэ хоёрт зөрүүтэй мэдээлэл гарсан болов уу гэж бодож байна" гэлээ.
Сэтгэгдэл (0)
Сэтгэгдэл бичигдээгүй байна